Jorge Jesus tregon se pse e la në stol Ronaldon, për ndeshjen ndaj Norvegjisë

Jorge Jesus ka bërë një surprizë të madhe para përballjes së sontme mes Norvegjisë dhe Portugalisë në stadiumin “Ullevaal” në Oslo.

Ai e ka lënë Cristiano Ronaldon në bankën e rezervistëve.

Ky vendim e ka privuar ndeshjen e shumëpritur nga dueli mes Ronaldos dhe Erling Haalandit që nga minuta e parë.

Jesus e shpjegoi vendimin e tij para fillimit të ndeshjes, sipas gazetës “Mundo Deportivo”: “Sot është dita e tretë. Ronaldo luajti rreth 70 minuta në ndeshjen ndaj Uellsit dhe mendova se nuk mund të luante nga fillimi në dy ndeshje radhazi sot”.

“Ne e duam Ronaldon në këto katër ndeshje, edhe nëse është vetëm për disa minuta, por duam që ai të jetë në fushë”, vazhdoi ai.

Ronaldo, 41 vjeç, e nisi nga minuta e parë ndeshjen e së enjtes, kur Portugalia mposhti Uellsin 1-0. Kampionët tani do të udhëtojnë drejt Danimarkës të enjten e ardhshme, përpara se ta presin Norvegjinë më 4 tetor.

Kanë kaluar dy vjet që nga hera e fundit kur Ronaldo e nisi një ndeshje të Portugalisë nga banka e rezervistëve. Rasti i fundit ishte më 8 shtator 2024, në ndeshjen e Ligës së Kombeve kundër Skocisë, të cilën Portugalia e fitoi 2-1. Roberto Martinez e inkuadroi atë në pjesën e dytë dhe Ronaldo e vendosi ndeshjen me golin e shënuar në minutën e 88-të.

Në vend të Ronaldos, Jesus aktivizoi Gonçalo Ramosin në majë të sulmit, ndërsa në formacion ishin edhe João Félix, autor i golit ndaj Uellsit, dhe João Neves.

Trajneri i Norvegjisë, Ståle Solbakken, e aktivizoi Haalandin nga minuta e parë, pas dy golave të tij në fitoren 3-2 të skuadrës ndaj Danimarkës të enjten.