Komandanti i lartë i NATO-s paralajmëron: Nëse dikush na sulmon, do të luftojmë

Komandanti Suprem i Forcave Aleate të NATO-s në Evropë, gjenerali amerikan Alexus Grynkewich, ka paralajmëruar se aleanca është e gatshme të përgjigjet ushtarakisht në rast sulmi.

“Nëse dikush është aq i pamatur sa të na sulmojë, ne do të luftojmë”, deklaroi Grynkewich gjatë Forumit të Sigurisë në Varshavë.

Ai theksoi se nuk beson që një konflikt është “i afërt apo i pashmangshëm”, por nënvizoi se NATO është “gati të luftojë që sonte”, nëse sulmohet.

Gjenerali nuk e përmendi drejtpërdrejt Rusinë, por deklaratat e tij vijnë në një kohë kur NATO po paralajmëron gjithnjë e më shpesh për kërcënimin që paraqet Moska.

Daçiç provokon sërish: Flamuri serb do të valëvitet në Prizren! Ai ishte kryeqyteti ynë
Grynkewich shpjegoi se, në rast të një sulmi, NATO do të synonte fillimisht të bllokonte forcat sulmuese, më pas të dobësonte goditjen e tyre dhe në fund ta mposhtte kundërshtarin.

“Duhet të kemi besim te aftësia jonë për të ushtruar efekte masive dhe te paralajmërimi i nënkuptuar se mund t’i përgjigjemi çdo lëvizjeje të armikut në shkallëzimin e konfliktit”, tha ai.

Sipas tij, këta faktorë duhet t’i bëjnë kundërshtarët të mendojnë dy herë përpara se të ndërmarrin një sulm, duke parë një aleancë të bashkuar, të fortë dhe të gatshme për veprim.

“Ata duhet ta kuptojnë shpejt se kostoja ushtarake e përshkallëzimit është tepër e lartë”, përfundoi komandanti i NATO-s.