Gjykata në Britani zbardh detajet e vrasjes së gruas shtatzënë me binjakë, partneri e goditi mbi 60 herë me thikë

Një ngjarje e rëndë ka tronditur veriun e Mançesterit në Britani, ku 31-vjeçari Steven Garner akuzohet për vrasjen brutale të partneres së tij, Amber O’Brien, 33 vjeçe, e cila ishte shtatzënë me binjakë.

Sipas dëshmive të paraqitura në gjykatë, gruaja u godit më shumë se 60 herë me thikë, kryesisht në fytyrë dhe qafë, pas një konflikti mes çiftit në prill të vitit të kaluar.

Trupi i 33-vjeçares u gjet në dyshemenë e banjës së banesës ku jetonte me partnerin. Sipas prokurorisë, viktima ishte e zhveshur dhe e mbuluar me një mushama blu.

Gjatë seancës gjyqësore, prokurori deklaroi se mjeku ligjor kishte evidentuar më shumë se 60 plagë të shkaktuara nga thika, përfshirë 32 plagë në fytyrë dhe qafë.

Pas vrasjes, Garner dyshohet se kaloi rreth një ditë e gjysmë duke u përpjekur të fshihte gjurmët e krimit. Sipas akuzës, ai e lau trupin e viktimës, pastroi banesën me zbardhues, largoi rrobat e përgjakura dhe shkatërroi telefonin e saj, ndërsa hodhi edhe telefonin e vet.

Policia mbërriti në banesën e 31-vjeçarit pasditen e 19 prillit, pasi ai dyshohet se i kishte thënë një të afërmi se e kishte goditur partneren dy herë në qafë.

Gjatë gjyqit u bë e ditur se Amber O’Brien i kishte treguar vëllait të saj për debatet e shpeshta me partnerin dhe pakënaqësinë e saj për ndryshimet e humorit të tij.

Vetëm dy javë para ngjarjes, ajo i kishte thënë vëllait se diçka nuk shkonte me të, duke shprehur shqetësimin për situatën që po përjetonte.

Ndërkohë, sipas asaj që u paraqit në gjykatë, Garner pritet të pretendojë se nuk kishte pasur qëllim t’i shkaktonte partneres dëmtime të rënda trupore dhe se në momentin e ngjarjes kishte humbur vetëkontrollin.

Ai pritet të deklarojë gjithashtu se ishte përpjekur të largohej nga banesa në orët e para të 18 prillit, por se partnerja e kishte goditur me grusht dhe kishte mbajtur një thikë.

Çështja po shqyrtohet nga drejtësia britanike, ndërsa pretendimet e palëve dhe rrethanat e plota të ngjarjes do të trajtohen gjatë procesit gjyqësor.