Kane arrin marrëveshje të re me Bayernin, kontrata deri në vitin 2029

Harry Kane ka arritur marrëveshje në parim për vazhdimin e kontratës me Bayern Munichun, duke qëndruar te gjiganti gjerman deri në qershor të vitit 2029.

Lajmi është bërë i ditur nga “Sky Sports”, sipas të cilit palët kanë gjetur gjuhën e përbashkët për vazhdimin e bashkëpunimit, ndërsa tashmë kanë mbetur vetëm detajet përfundimtare të dokumentacionit.

Bayerni është duke finalizuar procedurat përkatëse, përpara se ta konfirmojë zyrtarisht kontratën e re të sulmuesit anglez.

Kane është shndërruar në një prej lojtarëve kryesorë të skuadrës bavareze që prej transferimit nga Tottenham Hotspur në verën e vitit 2023. Me golat dhe paraqitjet e tij, kapiteni i Anglisë ka dëshmuar rëndësinë që ka për projektin sportiv të klubit.

Vazhdimi i kontratës deri në vitin 2029 do të ishte një sinjal i qartë se Bayerni synon ta mbajë sulmuesin 33-vjeçar si një prej figurave qendrore të skuadrës edhe në vitet e ardhshme.

Tashmë pritet që klubi gjerman të përfundojë dokumentacionin dhe ta bëjë zyrtar rinovimin e kontratës së njërit prej sulmuesve më të rëndësishëm në futbollin evropian.