Trump fajëson Zelenskyn për krizën energjetike. Evropa përballet me faturën e luftës
Presidenti amerikan Donald Trump po ashpërson kritikat ndaj homologut ukrainas Volodymyr Zelensky, kur rritja e çmimeve të karburanteve shton presionin ekonomik mbi administratën amerikane.
Çmimi mesatar i karburantit në SHBA arriti 4,27 dollarë për gallon javën e kaluar. Një nga faktorët e krizës është konflikti me Iranin dhe bllokimi i Ngushticës së Hormuzit, përmes së cilës kalon një e pesta e furnizimit botëror me naftë.
Në përpjekje për të frenuar çmimet, Uashingtoni njoftoi lehtësimin e disa kufizimeve ndaj naftës ruse, vendim që mund t’i sjellë Moskës të ardhura shtesë për financimin e luftës.
Trump ka kritikuar sulmet ukrainase ndaj rafinerive ruse dhe ka vënë në dyshim gatishmërinë e Zelenskyt për paqe, duke sugjeruar se Ukraina duhet të ketë një udhëheqës tjetër. Nga ana tjetër, Kievi argumenton se rafineritë ruse ndihmojnë në financimin e luftës dhe përbëjnë objektiva ushtarake.
Ndërkohë, gjatë samitit të Këshillit Evropian në Bruksel, Zelensky kërkoi mbështetje për Ukrainën, e cila përgatitet për një dimër të vështirë. Presidenti ukrainas vlerësoi se lufta do të kushtojë 155 miliardë euro vitin e ardhshëm, ku 70 miliardë euro duhet të mbulohen nga vendet evropiane. Kredia prej 90 miliardë eurosh, e miratuar nga BE për nevojat financiare të Ukrainës, nuk pritet të jetë e mjaftueshme.
E ndersa sigurimi i fondeve të reja po bëhet më i vështirë, ne Francë, Marine Le Pen ka kundërshtuar kontributet e mëtejshme për Kievin po ashtu edhe partia gjermane AfD kërkon që Berlini të mos financojë më Ukrainën. Këto qëndrime pasqyrojnë lodhjen e një pjese të opinionit publik evropian nga lufta dhe kostot e saj.
Udhëheqësit e BE i kanë kërkuar Komisionit Evropian të paraqesë deri në nëntor alternativa për të mbuluar mungesën e fondeve, borxhin e përbashkët dhe përdorimin e aseteve ruse të ngrira. Ende nuk ka një zgjidhje përfundimtare, ndërsa Evropa përballet me një vendim të vështirë: të sigurojë financimin e nevojshëm për Ukrainën apo të rrezikojë që Rusia të fitojë epërsi në luftë.