Vrau dentistin se i refuzoi vizitën pa takim, 30-vjeçari amerikan vritet në…

Një ngjarje e rëndë ka tronditur shtetin Sonora në Meksikë, ku një 30-vjeçar me origjinë amerikane, i dyshuar për vrasjen e dentistit të tij, është vrarë nga policia gjatë një përpjekjeje për arrestimin e tij. Sipas mediave, Eduardo Rascon dyshohet se vrau dentistin 42-vjeçar Amed de Jesús Presiado Hernández më 15 tetor, pasi ky i fundit nuk pranoi ta vizitonte pa një takim të rezervuar.

Ngjarja ndodhi në klinikën dentare ku Rascon kishte kryer më parë disa trajtime. Refuzimi i dentistit për ta pritur atë dyshohet se shkaktoi zemërimin e 30-vjeçarit. Pamjet e kamerave të sigurisë, të publikuara, tregojnë të dyshuarin duke pritur dentistin në parking. Kur Hernández mbërriti me furgonin e tij të bardhë, Rascon dyshohet se qëlloi disa herë me armë zjarri drejt tij.

Pas krimit, autoritetet nisën kërkimet për të dyshuarin. Policia e lokalizoi atë në qytetin Agua Prieta, ku, ai hapi zjarr ndaj efektivëve, duke shkaktuar një shkëmbim zjarri. Gjatë përplasjes mbetën të plagosur edhe dy oficerë policie. Njëri pësoi një plagë sipërfaqësore nga plumbi në kokë, ndërsa tjetri u plagos në këmbën e majtë.

Pavarësisht ndihmës së parë të marrë në vendngjarje, 30-vjeçari nuk arriti të mbijetonte. Rascon kishte pasur më parë kontakte me autoritetet për incidente të tjera, përfshirë raste të dyshuara të përdorimit të drogës dhe drejtimit të automjetit nën ndikimin e substancave.