PDK letër presidentes Pula, kërkojnë rishqyrtimin në Kuvend të ligjit për Speciale

Partia Demokratike e Kosovës, PDK i ka dërguar këtë të enjte një letër zyrtare Presidentes së Kosovës, Justina Shiroka-Pula, përmes së cilës i kërkon rikthimin në Kuvend për rishqyrtim dhe për ndryshim të Ligjit për Dhomat e Specializuara dhe Zyrën e Prokurorit të Specializuar.

PDK shton se rishqyrtimi do të mundësonte plotësimin e dispozitave të caktuara dhe forcimin e sigurisë juridike të ligjit, në funksion të interesit shtetëror dhe garantimit të plotë të të drejtave kushtetuese të çlirimtarëve tanë të cilët po gjykohen pranë Dhomave të Specializuara.

Partia Demokratike e Kosovës gjithashtu u ka bërë thirrje të gjithë ekspertëve që kanë shprehur gatishmëri për të kontribuuar, përfshirë edhe Avokatin e Popullit, që të paraqesin propozimet e tyre konkrete gjatë procesit të rishqyrtimit.

PDK i kërkon Presidentes rikthimin e ligjit për Dhomat e Specializuara në Kuvend për rishqyrtim: Angazhimi ynë vazhdon deri në hyrjen e tij në fuqi

Prishtinë, 22 tetor 2026 – Grupi Parlamentar i Partisë Demokratike të Kosovës, përmes një letre zyrtare, i ka kërkuar sot Presidentes së Republikës së Kosovës, znj. Justina Shiroka-Pula, rikthimin në Kuvend për rishqyrtim të Ligjit Nr. 11/L-001 për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.

Pas konsultimeve të gjera, PDK-ja vlerëson se rishqyrtimi do të mundësonte plotësimin e dispozitave të caktuara dhe forcimin e sigurisë juridike të ligjit, në funksion të interesit shtetëror dhe garantimit të plotë të të drejtave kushtetuese të çlirimtarëve tanë të cilët po gjykohen pranë Dhomave të Specializuara.

PDK-ja është krenare për nismën e saj ligjore dhe mbështetjen që ajo ka marrë. Mbrojtja e UÇK-së, e vlerave të luftës çlirimtare dhe mbështetja për çlirimtarët në Hagë mbeten përgjegjësi të panegociueshme.