Petrovska: Dua të jem kryetare e LSDM-së, por jo tani

Sllavjanka Petrovska foli hapur për ambiciet e saj politike dhe mundësinë që një ditë të marrë drejtimin e LSDM-së, por theksoi se në këtë moment partia ka nevojë për diçka shumë më të rëndësishme se ambicia individuale.

Në emisionin “Noqno Studio” në 4TV, Petrovska theksoi se LSDM-së në periudhën aktuale i duhet një ekip njerëzish me njohuri, kapacitet politik dhe përvojë, që do të mund ta nxjerrë partinë nga kriza.

“Është e natyrshme të kem ambicie. Unë, ndryshe nga të tjerët, do të jem shumë e sinqertë dhe do të them se po, kam ambicie, por nuk mendoj se tani duhet të jem kryetare e LSDM-së”, deklaroi Petrovska.

Ajo shtoi se nuk është vendimtare nëse lideri i ardhshëm do të jetë burrë apo grua, por nëse ai ose ajo do të ketë njohuri, pjekuri politike dhe përvojë të mjaftueshme për t’u përballur me sfidat që e presin partinë.

“LSDM-së i duhet një njeri, një personalitet që do të ketë kapacitet, njohuri politike dhe përvojë të madhe për ta kaluar këtë periudhë të vështirë që po vjen”, porositi ajo.

Me këtë deklaratë, Petrovska dërgoi mesazhin se e ardhmja e LSDM-së nuk duhet të reduktohet në një garë për postin e liderit, por në krijimin e një ekipi dhe një strategjie të qartë politike për ringritjen e partisë.