MAQEDONIA PREZANTOI STRATEGJINË 20-VJEÇARE PËR LËNDËT E PARA MINERALE NË ZAGREB – U RA DAKORD PËR BASHKËPUNIM NË ENERGJINË GJEOTERMALE
Në kuadër të konferencës ndërkombëtare DIM-ESEE 2026 – Zhvillimi dhe Inovacionet në Shfrytëzimin e Burimeve Minerale në Evropën Lindore dhe Juglindore, e cila u mbajt nga 21 deri më 23 tetor 2026 në Zagreb të Republikës së Kroacisë, këshilltari shtetëror për miniera në Ministrinë e energjisë, minierave dhe burimeve minerale, Filip Petrovski, mori pjesë si prezantues dhe panelist, duke paraqitur prioritetet strategjike dhe aktivitetet reformuese të Ministrisë në fushën e gjeologjisë dhe minierave.
Në kuadër të sesionit tematik kushtuar strategjive kombëtare për menaxhimin e burimeve minerale, Petrovski prezantoi Strategjinë për kërkimet gjeologjike, shfrytëzimin e qëndrueshëm dhe eksploatimin e lëndëve të para minerale në Republikën e Maqedonisë së Veriut për periudhën 2026–2046. Prezantimi u përqendrua te potenciali mineral i vendit, synimet zhvillimore afatgjata, modernizimi dhe digjitalizimi i të dhënave gjeologjike, përmirësimi i klimës së investimeve dhe menaxhimi i qëndrueshëm i burimeve minerale, me zbatimin e teknologjive bashkëkohore dhe standardeve të larta për mbrojtjen e mjedisit.
Petrovski mori pjesë edhe në panel-diskutimin “Rëndësia gjeopolitike dhe gjeoekonomike e Evropës Juglindore – mundësitë dhe pengesat”, ku u diskutua për rëndësinë gjeostrategjike të burimeve minerale, bashkëpunimin rajonal dhe rolin e Evropës Juglindore në sigurimin e lëndëve të para minerale kritike për nevojat e tranzicionit energjetik dhe industrial të Evropës.
Një nga rezultatet më të rëndësishme të pjesëmarrjes në konferencë ishte krijimi i bazës për bashkëpunim institucional në fushën e burimeve gjeotermale. Në takimin dypalësh me dekanin e Fakultetit të Minierave, Gjeologjisë dhe Naftës pranë Universitetit të Zagrebit, prof. dr. Borivoje Pashiq, u arrit marrëveshje për vendosjen e bashkëpunimit dhe përgatitjen e përbashkët të një aplikimi për projekt në kuadër të programit evropian “Horizon Europe”, i cili synon kërkimin dhe zhvillimin e burimeve gjeotermale.
Gjatë konferencës u zhvilluan edhe disa takime pune me përfaqësues të institucioneve shtetërore, universiteteve, shërbimeve gjeologjike dhe kompanive nga rajoni dhe Evropa. Përvojat dhe praktikat e mira të shkëmbyera, veçanërisht në fushën e legjislacionit dhe menaxhimit të burimeve minerale, janë të rëndësishme edhe për aktivitetet aktuale të Ministrisë për hartimin e Ligjit të ri për Minierat dhe Ligjit të ri për Gjeologjinë, me synim harmonizimin me standardet evropiane dhe sigurimin e zhvillimit të qëndrueshëm të sektorit.
Pjesëmarrja në DIM-ESEE 2026 është pjesë e aktiviteteve të vazhdueshme të Ministrisë për forcimin e bashkëpunimit ndërkombëtar, promovimin e potencialit mineral kombëtar dhe krijimin e partneriteteve të reja, në funksion të realizimit të synimeve strategjike për një sektor minerar modern, konkurrues dhe të qëndrueshëm.
