Konsumohet dro-gë në oborin e shkollës fillore “Kiril i Metodij” në Tetovë

Mbetje nga konsumi i substancave narkotike, xhama të thyer dhe papastërti të ndryshme. Këto janë pamjet trishtuese që gjenden në një objekt të improvizuar në oborin e shkollës fillore Kirili dhe Metodi në Tetovë. Ky objekt shërbente si strehim për punëtorët e pishinës që ka filluar para më shumë se 1 viti e që duhej të përfundonte këtë muaj, pra në tetor të vitit 2026, ka mbetur vetëm në konstruksion.

Drejtoresha e shkollës Sihana Kaba Kasami thotë se nuk ka pasur fare njohuri për gjendjen e barakës dhe se për këtë gjë është njoftuar nga mediat. Ajo pretendon se kjo barakë është jashtë objektit shkollor, edhe pse baraka gjendet vetëm 5 metra larg shkollës dhe është brenda perimetrit të shkollës, dhe gjithashtu është e çasshme për fëmijët!

Pavarësisht se tha se nuk është nën kompetenca të shkollës, më pas tha se mësuesit kujdestar kujdesën që nxënësit të mos futen aty.

E në fund fajëson investitorin dhe realizuesin, që në këtë rast është Komuna e Tetovës dhe eurovia.

Në fund, thotë se rastin e ka denoncuar në polici personalisht mbërmë, sapo është kontaktuar nga Gazetari i Televizionit Koha.

Megjithatë, nga Policia e Tetovës mohojnë të ketë pasur denoncim zyrtar nga Komuna e Tetovës.

Rexhepi thotë se në kudër të kontrolleve të zakonshme, dy policë patrullojnë thuajse në të gjitha shkollat fillore dhe të mesme në përditshmëri.

Nga Sektori për Arsim gjithashtu thonë se për gjendjen e barakës pranë shkollës fillore Kirili dhe Medoti janë njoftuar nga mediat mbrëmë. Ai thotë se personalisht ka kontaktuar me një nga shefat e policisë dhe se policia ka dalur mbrëmë në terren. Ndërsa zotohet se shumë shpjet, ndoshta brenda ditës, do të pastrohen mbetjet dhe do bëhet çmos që të mos lejohet përsëri të përdoren ambientet e shkollës për konsumim të substancave narkotike dhe gjërave tjera të pahishme.

Televizioni Koha tentoi të kontaktojë edhe me realizuesin, që në këtë rast është kompania Eurovia, për të kuptuar arsyet se përse nuk është ndërtuar në kohë pishina dhe përse nuk janë marr masa për sigurimin e ambienteve ku ata punojnë, megjithatë deri në këtë moment nuk kemi përgjigje.

Si redaksi do të vazhdojmë të ndjekim nga afër se si do të shkon procesi i pastrimit dhe mirëmbajtjes së hapësirave të shkollës dhe do të informojmë në vazhdimësi nëse nuk merren masa për rritjen e sigurisë.

Gjithashtu i inkurajojmë prindërit që kanë lajmëruar që për çdo parregullësi të na drejtohen meqë si gazetar jemi të detyruar që të jemi zëri i tyre dhe luftojmë dukuritë e tilla negative që e cënojnë sigurinë e më të dashurve tanë, sigurinë e fëmijëve!/Tv Koha/