Fakulteti Pedagogjik i UT-së e përmbylli me sukses edicionin e gjashtë të Javës së Veçantë Studimore, kushtuar inteligjencës artificiale dhe digjitalizimit në arsim

Fakulteti Pedagogjik i Universitetit të Tetovës e përmbylli sot edicionin e gjashtë të Javës së Veçantë Studimore (JVS) 2026, një veprimtari akademike që këtë vit iu kushtua temës “Inteligjenca artificiale dhe digjitalizimi në arsim – mundësi, sfida dhe përvoja praktike“. Aktiviteti përmbyllës u karakterizua nga prezantimi dhe ekspozimi i produkteve digjitale të zhvilluara nga studentët gjatë pesë ditëve të punës, duke sjellë në pah rezultatet konkrete të angazhimit të tyre dhe mundësitë që ofrojnë teknologjitë bashkëkohore për transformimin e praktikave edukativo-arsimore.
Partner i kësaj veprimtarie ishte Qendra e Maqedonisë për Edukim Qytetar (QMEQ), përfaqësuesit e së cilës kontribuuan në mënyrë aktive gjatë gjithë programit studimor. Krahas pjesëmarrjes në aktivitetet e ditëve paraprake, ata prezantuan edhe materiale dhe produkte të ndryshme digjitale të zhvilluara në kuadër të veprimtarisë së tyre, duke pasuruar dimensionin praktik dhe bashkëpunues të kësaj jave.
Në ekspozitën përmbyllëse morën pjesë studentë nga të gjitha programet studimore të Fakultetit Pedagogjik, përfaqësues të disa shkollave fillore të Komunës së Tetovës, si dhe përfaqësues të Shoqatës së Pedagogëve të Tetovës, kryetari Naim Kurtishi dhe Prof. Dr. Xheladin Murati. Ekspozitën e vizitoi edhe Rektori i Universitetit të Tetovës, Prof. Dr. Kushtrim Ahmeti, i cili u njoh nga afër me punimet e realizuara dhe rezultatet e arritura nga studentët, institucionet arsimore dhe partnerët e kësaj veprimtarie.
Një nga veçoritë e ekspozitës ishte përfshirja aktive e përfaqësuesve të shkollave, të cilët, përveç vizitës, prezantuan edhe materiale dhe pako të ndryshme digjitale të përgatitura në institucionet e tyre. Në këtë mënyrë, veprimtaria tejkaloi formatin e një ekspozite tradicionale, duke u shndërruar në një platformë bashkëpunimi dhe shkëmbimi profesional, ku studentët, mësimdhënësit, pedagogët dhe përfaqësuesit e organizatave partnere patën mundësi të ndanin përvojat, të prezantonin praktikat e tyre dhe të diskutonin mbi mundësitë e zbatimit të inovacioneve digjitale në arsim.
Java e Veçantë Studimore, e organizuar për të gjashtin vit radhazi, tashmë përfaqëson një traditë të konsoliduar akademike të Fakultetit Pedagogjik. Edicioni i këtij viti synoi të trajtojë në mënyrë gjithëpërfshirëse ndikimin e inteligjencës artificiale dhe të digjitalizimit në procesin edukativo-arsimor, duke ndërthurur njohuritë teorike me demonstrimet praktike, punën krijuese dhe diskutimet profesionale. Përmes këtij programi, studentëve iu ofrua mundësia të njihen me mjetet dhe platformat bashkëkohore, të eksplorojnë potencialin e tyre pedagogjik dhe të zhvillojnë kompetenca të rëndësishme për profesionin e ardhshëm.
Programi i aktiviteteve nisi të hënën, më 26 tetor me aktivitetet hyrëse, ndërsa të martën, më 27 tetor vijoi me ligjëratën e Doc. Dr. Mirlinda Shaqirit, me temë “AI për krijimin e materialeve mësimore“. Gjatë kësaj ligjërate, studentët u njohën me mënyrat e shfrytëzimit të inteligjencës artificiale për hartimin dhe përshtatjen e materialeve mësimore, fletëve të punës, pyetjeve, tregimeve, lojërave edukative, ushtrimeve për zhvillimin gjuhësor dhe materialeve gjithëpërfshirëse.
Pas pjesës teorike, studentët vijuan me punë praktike në grupe, të organizuara sipas programeve studimore, ku përmes përdorimit të mjeteve të inteligjencës artificiale hartuan materiale dhe pako digjitale të përshtatura me grup-moshat, objektivat mësimore dhe nevojat individuale të fëmijëve dhe nxënësve. Kjo qasje u mundësoi atyre të kuptojnë jo vetëm potencialin krijues të teknologjisë, por edhe rëndësinë e përdorimit të saj në funksion të nevojave konkrete pedagogjike.
Të mërkurën, më 28 tetor, programi vazhdoi me ligjëratën “Krijimi i përmbajtjeve digjitale dhe mësimi interaktiv“, të mbajtur nga Prof. Dr. Teuta Ramadani-Rasimi dhe Prof. Dr. Jasmina Troshanska. Në fokus të kësaj dite ishte njohja me platforma dhe mjete të ndryshme digjitale që mundësojnë krijimin e përmbajtjeve interaktive dhe pasurimin e përvojës së të nxënit. Studentët u njohën me mundësitë e hartimit të prezantimeve interaktive, kuizeve, videove edukative, librave elektronikë, materialeve vizuale dhe aktiviteteve mësimore të bazuara në përdorimin e kodeve QR.
Në pjesën praktike, ata realizuan mësime të vogla digjitale dhe produkte interaktive, përmes të cilave zbatuan njohuritë e fituara dhe eksperimentuan me forma të reja të organizimit të mësimdhënies. Produktet e krijuara u prezantuan dhe u vlerësuan në kuadër të aktiviteteve të përbashkëta, duke nxitur kreativitetin, bashkëpunimin dhe mendimin inovativ.
Një dimension tjetër me rëndësi të veçantë u trajtua të enjten më 29 tetor, përmes temës “Mësuesi në epokën e AI-së – etika, siguria dhe projekti final“. Në kuadër të kësaj dite u organizua një panel diskutimi me pjesëmarrjen e Prof. Dr. Rabije Muratit, Suad Seferit nga Qendra e Maqedonisë për Edukim Qytetar (QMEQ), si dhe pesë studentëve përfaqësues nga programet studimore të Fakultetit Pedagogjik: Lejla Mati – Mësim Klasor; Amra Ziberi – Pedagogji Profesionale; Erblina Skenderi – Logopedi; Vesa Zylbeari – Edukim Parashkollor dhe Gilshah Shaqiri – Edukim Special dhe Rehabilitim (ESR).
Diskutimi trajtoi disa nga çështjet më aktuale që shoqërojnë integrimin e inteligjencës artificiale në arsim, duke përfshirë privatësinë dhe mbrojtjen e të dhënave, sigurinë e fëmijëve në mjedisin digjital, autorësinë, plagjiaturën, paragjykimet algoritmike dhe përhapjen e informacioneve të pasakta. Përmes analizës së situatave konkrete dhe shkëmbimit të pikëpamjeve, panelistët shqyrtuan edhe dilemën gjithnjë e më të pranishme në debatin bashkëkohor arsimor: “A do ta zëvendësojë inteligjenca artificiale mësuesin?“.
Në këtë kontekst, vëmendje e veçantë iu kushtua rolit të pazëvendësueshëm të mësuesit në edukimin dhe formimin e fëmijëve dhe nxënësve, si dhe nevojës që teknologjia të përdoret në mënyrë etike, kritike dhe të përgjegjshme. U theksua rëndësia e ndërgjegjësimit për kufizimet e mjeteve të inteligjencës artificiale dhe e ruajtjes së dimensionit njerëzor, pedagogjik dhe ndërveprues të procesit edukativo-arsimor.
Në pjesën e dytë të kësaj dite, studentët vazhduan punën në grupe për ndërthurjen e planeve mësimore me produktet digjitale dhe për zhvillimin e projekteve të integruara. Kjo fazë shërbeu si përgatitje për prezantimet përfundimtare, duke u mundësuar studentëve të organizojnë dhe të sistemojnë rezultatet e punës së tyre në produkte konkrete për ekspozitën përmbyllëse.
Aktiviteti i sotëm përmbylli këtë proces pesëditor përmes prezantimit të një game të gjerë produktesh dhe materialesh të realizuara nga studentët. Në mesin e tyre u përfshinë materiale mësimore të krijuara me mbështetjen e inteligjencës artificiale, kuize interaktive, libra elektronikë, video edukative, infografika, aktivitete mësimore përmes kodeve QR, si dhe projekte të integruara për fusha të ndryshme të edukimit dhe arsimit. Krahas punimeve studentore, prezantimi i materialeve të shkollave dhe i produkteve digjitale të QMEQ-së krijoi mundësi për njohjen dhe promovimin e praktikave të mira, duke forcuar bashkëpunimin ndërmjet arsimit universitar dhe institucioneve të arsimit parauniversitar.
Në shenjë vlerësimi për angazhimin dhe pjesëmarrjen e tyre, në përfundim të veprimtarisë u shpërndanë certifikata për të gjithë pjesëmarrësit e Javës së Veçantë Studimore 2026. Certifikatat u ndanë nga dekani i Fakultetit Pedagogjik, Prof. Dr. Lulzim Mehmedi, përfaqësuesi i QMEQ-së, Besnik Ramadani, si dhe përfaqësuesit e programeve studimore, Prof. Dr. Buniamin Memedi, Prof. Dr. Ardita Ceka dhe Prof. Dr. Gezim Xhambazi.
Përmbyllja e suksesshme e edicionit të gjashtë të Javës së Veçantë Studimore përbën një dëshmi tjetër të përkushtimit të Fakultetit Pedagogjik për avancimin e cilësisë së studimeve, përditësimin e përmbajtjeve dhe metodave mësimore, si dhe përgatitjen profesionale të studentëve në përputhje me zhvillimet bashkëkohore në fushën e arsimit. Njëkohësisht, bashkëpunimi me QMEQ-në, shkollat fillore dhe Shoqatën e Pedagogëve të Tetovës i dha kësaj veprimtarie një dimension të rëndësishëm ndërinstitucional, duke krijuar hapësira konkrete për ndërveprim dhe shkëmbim të përvojave ndërmjet komunitetit akademik dhe praktikës shkollore.
Përmes kësaj nisme, Fakulteti Pedagogjik synon të formojë kuadro të përgatitura për t’iu përgjigjur kërkesave dhe sfidave të arsimit bashkëkohor, të afta për të integruar në mënyrë të qëllimshme dhe pedagogjikisht të argumentuar teknologjitë e reja në praktikën e tyre profesionale. Në këtë këndvështrim, inteligjenca artificiale dhe digjitalizimi nuk trajtohen si alternativa që zëvendësojnë mësuesin, por si mjete që, të përdorura me kompetencë dhe përgjegjësi, mund të pasurojnë mësimdhënien, të mbështesin të nxënit, të nxisin kreativitetin dhe të kontribuojnë në krijimin e mjediseve arsimore më gjithëpërfshirëse dhe më efektive.