Ndërron jetë profesori dhe kirurgu i njohur torakal nga Shkupi, Zoran Spirovski

Ka ndërruar jetë prof. dr. Zoran Spirovski, kirurg i njohur torakal, ish-drejtor i Klinikës së Kirurgjisë Torakale dhe Vaskulare dhe profesor në Fakultetin e Mjekësisë në Shkup.

Lajmin për vdekjen e tij e bëri të ditur Sasho Klekovski, i cili theksoi se Spirovski ka lënë gjurmë të thella në sistemin shëndetësor të Maqedonisë së Veriut, përmes punës shumëvjeçare, përkushtimit dhe profesionalizmit të tij.

Gjatë karrierës së tij, ai ka ndihmuar një numër të madh pacientësh, ndërsa si profesor ka përcjellë njohuritë, përvojën dhe vlerat profesionale te gjenerata të tëra të kirurgëve të rinj.

Klekovski shprehu ngushëllimet më të sinqerta për familjen, kolegët dhe të gjithë ata që e kanë njohur, me mesazhin: „Pusho në paqe, profesor!“.

Vdekja e tij shënon humbjen e një profesionisti dhe pedagogu që një pjesë të madhe të jetës ia kushtoi mjekësisë dhe edukimit të brezave të rinj.