Lukarevska për ribalancin: Buxheti zhvillimor që u prezantua me pompozitet gjatë verës u shndërrua në një shkronjë të vdekur në letër
Deputetja e LSDM-së, Sanja Lukarevska, në seancën e sotme parlamentare për ribalancin e Buxhetit për vitin 2026, theksoi se edhe ky ribalanc i dytë është konfirmim i planifikimit tërësisht të gabuar ekonomik të Qeverisë së VMRO-DPMNE-së.
Lukarevska theksoi se pushteti sërish po rishikon të hyrat dhe shpenzimet, po i zvogëlon mjetet për investime kapitale, por po e mban të pandryshuar deficitin e rritur prej 46,2 miliardë denarësh.
“Në tetor, shpenzimet kapitale zvogëlohen në 40,1 miliardë denarë, ose identikisht me buxhetin fillestar, ndërsa deficiti mbetet 46,2 miliardë denarë, përkatësisht 7 miliardë më shumë se plani fillestar. Prej nga buron arsyetimi ekonomik për zgjerimin e pandryshuar të deficitit?”, tha Lukarevska.
Ajo shtoi se po shkurtohen mjetet për projekte kapitale në fushën e mjedisit jetësor, energjetikës dhe arsimit. Sipas saj, Ministrisë së Mjedisit Jetësor i reduktohen më shumë se dy miliardë denarë, ndërsa mjetet për gazifikim nga 1,9 miliardë denarë reduktohen në vetëm 12 milionë denarë.
“Riformulimi i menjëhershëm i prioriteteve të shpenzimeve brenda tre muajve kërkon shpjegim se cilat projekte kanë qenë të gatshme për realizim në korrik, çfarë ka ndryshuar deri në tetor dhe cilat obligime do të transferohen në vitin 2027”, deklaroi Lukarevska.
Deputetja e LSDM-së shtoi se është veçanërisht shqetësuese që Qeveria po zvogëlon fondet pikërisht në sektorë që ndikojnë drejtpërdrejt në cilësinë e jetës së qytetarëve. Sipas saj, po reduktohen mjetet për luftën kundër ndotjes së ajrit, parandalimin shëndetësor, imunizimin, pajisjet mjekësore dhe rindërtimin e institucioneve shëndetësore.
“Ministria e Mjedisit humb më së shumti në segmentin e luftës kundër ndotjes së ajrit. Kjo do të thotë se ajri i pastër nuk është prioritet, gjë që është paradoksale. Zvogëlohen mjetet edhe për mbrojtjen shëndetësore preventive, për Agjencinë e Barnave dhe Pajisjeve Mjekësore, si dhe për imunizimin e detyrueshëm të popullsisë”, tha Lukarevska.
Ajo paralajmëroi edhe për seriozitetin e borxhit publik, duke theksuar se ai po i afrohet kufirit ligjor prej 60 për qind të BPV-së. Sipas të dhënave të paraqitura në ribalanc, më 30 qershor borxhi shtetëror ishte 51,7 për qind, ndërsa borxhi publik kishte arritur në 58,8 për qind të BPV-së.
“Këto të dhëna tregojnë se borxhi publik po i afrohet kufirit prej 60 për qind, gjë që është arsye e mjaftueshme për alarm dhe shqetësim, siç e ka theksuar edhe Këshilli Fiskal”, deklaroi ajo.
Lukarevska theksoi se edhe me këtë ribalanc të dytë pushteti nuk ka paraparë mjete për rritjen e pagës minimale dhe as për përmirësimin e pozitës së bujqve, ndërsa amendamentet e LSDM-së dhe koalicionit për këto qëllime janë refuzuar.
“Nuk janë paraparë mjete për pagën minimale. Ne kishim amendament për këtë dhe ai u refuzua. Nuk kishte mjete as për përmirësimin e gjendjes së bujqve dhe edhe ai amendament u refuzua. U shkurtuan mjete për zgjidhje softuerike. Kështu, ai ribalanc zhvillimor që u prezantua me fanfara gjatë verës, tani është bërë vetëm një shkronjë e vdekur në letër”, tha Lukarevska.
Në fjalimin e saj, ajo theksoi se në një kohë kur qytetarët përballen përditë me shtrenjtimet, Qeveria nuk ka përgjigje as për standardin jetësor dhe as për pagat e ulëta.
“Shporta minimale sindikale në tetor është mbi 70.000 denarë dhe as tri paga nuk mjaftojnë për të mbuluar shpenzimet themelore të jetesës. Pagat duhet t’i ndjekin shtrenjtimet, veçanërisht kur kemi 180.000 punëtorë që marrin paga më të ulëta se 31.200 denarë dhe një pagë minimale që nuk lëviz nga 26.000 denarë. Ky ribalanc tregon se po ndërtojmë një shoqëri më shumë për punëdhënësit sesa për punëtorët. Vetëm kështu mund të dalim nga prapambetja dhe varfëria. Ky ribalanc është kundër prioriteteve që u premtuan dhe nuk përmban asgjë që lidhet me premtimet për mbështetje të rritjes ekonomike dhe përmirësimin e standardit jetësor. Ne si grup parlamentar nuk do ta mbështesim këtë ribalanc”, deklaroi Lukarevska.
