Nafta po lirohet, ndërsa dollari arrin nivelin më të lartë në 19 muaj

Çmimet e naftës kanë rënë këtë mëngjes. Në tregun e Londrës, çmimi i një fuçie nafte bruto Brent ra me 0,96 për qind, në 91,90 dollarë, ndërsa në tregun amerikan, një fuçi e naftës së markës WTI u ul me 0,94 për qind, në 85,70 dollarë.

Ndërkohë, në tregjet valutore, dollari amerikan ndaj shportës së valutave arriti nivelin më të lartë që nga prilli i vitit 2025, pasi investitorët janë pothuajse të sigurt se Banka Qendrore Amerikane do t’i rrisë normat e interesit me 0,25 pikë përqindjeje në dhjetor.

Indeksi i dollarit, i cili mat vlerën e monedhës amerikane kundrejt gjashtë valutave kryesore botërore, këtë mëngjes ishte rreth 103,02 pikë, ndërsa dje në të njëjtën kohë ishte 102,30 pikë.

Njëkohësisht, kursi i dollarit ndaj jenit japonez u rrit nga 158,75 jenë, sa ishte dje, në 159,65 jenë.

Lexo edhe
Nafta bie sërish në tregjet ndërkombëtare, Brent zbret nën 97 dollarë për fuçi
Monedha amerikane u forcua edhe ndaj euros, duke bërë që vlera e euros të bjerë në 1,1080 dollarë, krahasuar me 1,1165 dollarë sa ishte dje në të njëjtën periudhë të tregtimit.