1 milion euro nga shteti për çdo mërgimtar që investon në Maqedoni

Ministri i Ekonomisë, Kreshnik Bekteshi dje përmes rrjetit social facebook shkruan që çdo mërgimtar e ka mundësinë e përfitimit 1 milion euro nga shteti nëse investon në Maqedoninë e Veriut. Ai gjithashtu në fjalimin e tij në Bogovinë mes tjerash tha se mundi dhe sakrifica e mërgimtarëve tanë të kthehet në vendin e tyre.

“Çdo investim i cili ndodh nga një mërgimtarë në Maqedoninë e Veriut do të mbeshtetet deri në 1 milion euro mjete të pakthyeshme nga Qeveria, me qëllim që mundi dhe sakrifica e tyre të kthehet në vendin e vet”, deklaroi ministri i ekonomisë, Kreshnik Bekteshi, në hapjen solemne të fabrikës për prodhimin e telave dhe tubave të bakrit të kompanisë Multipark Izairi në Kamjan të komunës së Bogovinës.

Bekteshi theksoi se me qëllim tërheqjen e investimeve të huaja por jo vetëm nga kompani të cilat kanë pronësi të huaj por edhe nga bashkëvendasit tanë të cilët jetojnë jasht shtetit.

Zëvendëskryeministri i Qeverisë, Fatmir Bytyqi tha se Qeveria përmes politikave ekonomike efikase është e fokusuar të krijojë një mjedis të qëndrueshëm ekonomik, siç dëshmohet nga suksesi i kësaj kompanie me të cilën Qeveria ka partneritet që në fillimet e saj.

“Mbështetja e Qeverisë, e cila e mbështet këtë kompani përmes Ligjit për Mbështetjen Financiare të Investimeve, është tregues i politikave të suksesshme ekonomike të vendit, dhe krijon një klimë të volitshme për kompanitë, duke i stimuluar ato të hyjnë në cikle të reja investimi. Marrëveshjen për ndihmë financiare investive Multipark Izairi e ka nënshkruar në vitin 2021 dhe vetëm për ciklin investues të atij viti kompania ka marrë ndihmë financiare shtetërore prej 47 milionë denarë, e cila do të vazhdojë deri në përfundim të projektit të tyre”, tha Bytyqi.