CIVIL dënon ashpër sulmin e Kanal 5 ndaj lirisë së shprehjes

CIVIL – Qendra për Liri, si organizatë për të drejtat dhe liritë e njeriut, dhe redaksia e CIVIL MEDIA, e dënojnë ashpër aktin e drejtorit të Kanalit 5, Ivan Mirçevski, i cili hyri në program, në emisionin “Vetëm e vërteta” dhe me shprehje të drejtpërdrejta të ashpra e dëboi nga studio të ftuarin Ismet Ramadani, intelektual i shquar, ish-deputet dhe këshilltar aktual në qeveri dhe personi i parë në Këshillin Euroatlantik.

Mirçevski, me këtë akt tregoi nënvlerësim të skajshëm ndaj lirive të mediave, dhe mungesë të plotë të kapacitetit profesional dhe moral. Me sjelljen e paqytetëruar dhe me dëbimin e të ftuarit nga studio, para syve të gjithë publikut, drejtori i televizionit ka cenuar drejtpërdrejt standardet etike dhe profesionale dhe lirinë e shprehjes.

Njëkohësisht, me veprimin e tij, drejtori i televizionit ka shkelur Ligjin për Marrëdhëniet e Detyrimeve dhe ka shkelur rëndë të drejtën e njeriut për lirinë e fjalës, duke ia pamundësuar të ftuarit paraprakisht nga televizioni, të shprehë mendimin e tij.

Kjo është krejtësisht e papranueshme!

Përgjegjësi ka edhe gazetari – drejtuesi i emisionit duke i mundësuar vullnetarisht dhe me miratim drejtorit të marrë situatën në dorë dhe ta përjashtojë të ftuarin nga emisioni i tij.

Kjo ngjarje fatkeqe është rast që sërish t’u bëhet thirrje gazetarëve, të mos i nënshtrohen presionit të atyre që veprojnë nga pozita e pushtetit dhe i shkelin të drejtat dhe liritë e njeriut.

Për këtë veprim, dhe praktika të ngjashme, duhet të mbahet përgjegjësi. Më e pakta që duhet të ndodhë tani, është që i ftuari Ramadani, por edhe i gjithë publiku, të pranojë falje nga redaksia e emisionit dhe nga Kanal 5, ndërsa drejtori të japë dorëheqje.

Rikujtojmë opinionin se ky akt i Mirçevskit do të ndikojë edhe në vlerësimet e institucioneve dhe organizatave ndërkombëtare për lirinë e shprehjes dhe liritë e mediave.

Institucionet, organet rregulluese dhe vetërregulluese kanë detyrimin dhe mandatin që ta dënojnë në mënyrën më të ashpër këtë sjellje dhe ta sanksionojnë.

CIVILi i bën thirrje publikut që me vendosmëri dhe ashpërsi të dënojë të gjithë ata që tentojnë të shkaktojnë polarizim dhe tensione ndëretnike.