Të paktën 24 persona kanë humbur jetën nga zjarret në Los Angeles – Shërbimi meteorologjik ka paralajmëruar erëra deri në 110 km/h

Të paktën 24 njerëz humbën jetën në zjarrin e madh të pyjeve që vazhdojnë të shkatërrojnë zonën e Los Anxhelosit në shtetin e Kalifornisë, njoftuan autoritetet mjekësore.

Gjashtëmbëdhjetë nga viktimat janë lidhur me zjarrin Eaton pranë Pasadenës, ndërsa tetë të tjera me zjarrin Palisades në zonën e Pacific Palisades. Që nga e martja, kanë shpërthyer disa zjarre të mëdha në rajon, por këto dy janë më të rënda, raportoi DPA.

Autoritetet lokale shprehin frikën se numri i viktimave mund të vazhdojë të rritet, pasi mund të kalojnë disa ditë para se shërbimet e urgjencës të mund të arrijnë sigurt në të gjitha zonat e prekura nga zjarret.

Shërbimi meteorologjik amerikan parashikoi erëra deri në 110 kilometra në orë për të dielën, gjë që, në kombinim me bimësinë e thatë, kontribuon në përhapjen e shpejtë dhe të paparashikueshme të zjarreve ekzistuese dhe atyre të reja. Departamenti i Pyjeve dhe Mbrojtjes Kundër Zjarreve të Kalifornisë paralajmëroi për “kohë kritike për zjarret” deri të mërkurën.

“Erëra që rrezikojnë jetën dhe lagështira tepër e ulët parashikohen për pjesën më të madhe të Kalifornisë Jugore, nga Ventura deri në San Diego, duke krijuar një rrezik të madh për përhapjen e shpejtë të zjarreve”, thuhet në një njoftim nga departamenti në X.

Autoritetet paralajmëruan se erëra do të rrisin aktivitetin e zjarreve dhe u bënë thirrje njerëzve të shmangin kositjen e barit dhe parkimin e automjeteve mbi bar të thatë, si dhe të sigurohen që të gjitha zjarret e kampingut të shuhen.

Departamenti i Pyjeve dhe Mbrojtjes Kundër Zjarreve të Kalifornisë njoftoi se rreth 12,300 ndërtesa janë shkatërruar ose dëmtuar. Që nga e martja, janë djegur rreth 163 kilometra katrorë tokë, një sipërfaqe pothuajse sa ajo e shtetit të Washington.