Ushtria ukrainase ka kapur ushtarë nga Koreja e Veriut, Zelensky publikoi fotografi

Presidenti i Ukrainës, Volodymyr Zelensky, deklaroi sot se ushtria e vendit ka kapur dy ushtarë nga Koreja e Veriut në rajonin Kursk të Rusisë.

Siç raportoi Reuters, Zelensky tha se ushtarët e kapur nga Koreja e Veriut po bashkëpunojnë me Shërbimin e Sigurisë së Ukrainës.

“Kjo nuk ishte një detyrë e lehtë: forcat ruse dhe personeli tjetër ushtarak i Koresë së Veriut zakonisht ekzekutojnë të plagosurit e tyre për të fshirë çdo provë të përfshirjes së Koresë së Veriut në luftën kundër Ukrainës,” shtoi Zelensky.

Në dhjetor të vitit të kaluar, Zelensky deklaroi se mbi 3,000 ushtarë të Koresë së Veriut ishin vrarë ose plagosur gjatë luftimeve kundër forcave ukrainase të stacionuara në rajonin Kursk të Rusisë.

Sipas Ukrainës dhe SHBA-së, Pheniani ka dërguar mijëra ushtarë në Rusi për të forcuar ushtrinë ruse në luftën kundër Ukrainës, disa prej të cilëve janë vendosur në Kursk, ku trupat ukrainase papritur kryen një ofensivë në gusht dhe morën kontrollin mbi një pjesë të territorit.

https://x.com/ZelenskyyUa/status/1878046090018042169