Vota inatçore përcakton fituesin e zgjedhjeve të 9 shkurtit!
Shkruan: Florim Zeqa, 16.01.2025
Vota inatçore përcakton fituesin e zgjedhjeve të 9 shkurtit!
Jo të gjithë qytetarët e vendit janë duke u angazhuar për ndryshime në këtë vend. Bashkëfajtor janë të gjithë ata të cilët me votën e tyre po i mbajnë në pushtet këtë klasë injorantësh dhe kusarësh politikë.
Në mungesë bojkoti, do të fitojë hipokrizia politike
Para se të lëshohem në analizën politike parazgjedhore, zgjidhja më e mirë do të ishte bojkoti total i këtyre zgjedhjeve, si e vetmja mundësi për ndëshkimin e përgjithshëm të kësaj klase politike, por meqenëse kjo është e pamundur të ndodhë, atëherë, duhet një reflektim maksimal i elektoratit deri në ditën e votimit.
LDK-ja si partia më e vjetër dhe me traditën më të gjatë demokratike, do ta ketë të vështirë të shënojë ngritje numerike nga zgjedhjet e kaluara shkaku i injorimit dhe mospërfshirjes së themeltarëve në listën zgjedhore. Megjithatë, ekziston një mundësi imagjinare për rimëkëmbjen numerike të LDK-së, ajo është tek “ringjallja” e ëngëllit Rugovë!
PDK si partia më e madhe opozitare në Kosovë, e tillë pritet të mbetet edhe pas zgjedhjeve të 9 shkurtit 2025. Kur jemi tek PDK-ja, vlenë për t’u theksuar se, për dallim nga LDK-ja, edhe pas ndarjes së NISMA-s, ajo arriti ta ruaj elektoratin e saj besnik.
AAK si subjekti i tretë opozitarë, në të gjitha zgjedhjet ka arritur ta ruaj konstancën e subjektit politik me ngritje dhe rënje të lehta, duke u bërë pjesë konstruktive e pothuajse të gjitha qeverisjeve të pasluftës. Bashkimi me NISMA nuk do ta ndihmojë më shumë sesa bashkimi me PSD-në katër vite më parë.
Koalicioni për Familjen me vetëm 72 deputet në garën zgjedhore mund të jetë surpriza e këtyre zgjedhjeve dhe atë si rezultat i suportit nga biznesmeni më i njohur në trevat shqiptare, i liderit të AKR-së, z. Behgjet Pacolli.
Qëllimisht e lash për fund partinë e parë politike, LVV-në e cila erdhi në pushtet me grumbullimin e të gjitha ideologjive politike, duke e kthyer Lëvizjen në deponi të të pakënaqurve politikë, por jo edhe në forcë reale të ndryshimit pozitiv politik.
Përmbajtja nga brenda, e të gjitha llojeve dhe ngjyrave politike, e bën LVV-në subjektin më heterogjen të skenës politike kosovare.
LVV-ja sot më shumë i ngjet një lumi të vërshuar sesa një oqeani të qetë. Në të ardhmen e afërt kur lumi (LVV) të kthehet në shtratin e vet, do të shihet realisht sasia dhe pastërtia e kësaj force politike.
Arsyeja pse LVV-ja nuk paraqet ndryshim substancial për vendin, është fakti se brenda saj ka eksponent që deri dje ishin pjesë e keq-qeverisjes, e korrupsionit dhe krimit të organizuar, e kapjes së institucioneve të shtetit dhe e uzurpimit të pronave publike.
Djajtë me një të ndërruar të gzofit nuk kthehen në ëngjuj, por ëngjujt mund të kthehen në djajë brenda natës!
Për dallim nga herat e tjera, kësaj radhe vota qytetare nuk do të jetë shprehje e vullnetit të lirë, por votë inatçore, e shprehjes së urrejtjes individuale e motivuar po ashtu për hakmarrje personale dhe partiake.
Florim Zeqa, 17 Janar 2025
