“Përse më bullizojnë?”/ Dhjetëra persona pyeten për 17-vjeçaren që i dha fund jetës, detaje mbi hetimet e ngjarjes tragjike

Gjirokastra mbeti e tronditur pas ngjarjes tragjike që ndodhi pesë ditë më parë, ku një vajzë e re i dha fund jetës. Prokuroria e Gjirokastrës ka hapur hetime të thelluara dhe ka filluar marrjen në pyetje të dhjetëra personave lidhur me rrethanat që mund të kenë çuar 17-vjeçaren drejt aktit ekstrem të vetëflijimit. Hetimet janë bazuar në disa shënime të gjetura në një letër dhe një ditar të mbajtur në telefonin e saj, të cilat kanë ngritur dyshime mbi faktorët që mund të kenë ndikuar në këtë vendim fatal.

Në mesin e personave që do të merren në pyetje janë nxënës të shkollës, mësues, si dhe punonjës të ndryshëm të sistemit arsimor në Gjirokastër. Përveç tyre, hetuesit kanë ftuar për dëshmi familjarët dhe shoqet e vajzës. Ky hulumtim është thelluar pas zbulimit të disa elementëve që mund të kenë ndikuar në gjendjen e saj emocionale, përfshirë bullizmin dhe izolimin shoqëror që ajo përjetonte.

Sipas të dhënave nga grupi hetimor, përveç dëshmive të mbledhura nga oficerët e policisë gjyqësore, është intervistuar gjithashtu stafi pedagogjik dhe drejtuesit e gjimnazit “Siri Shapllo”, si dhe përfaqësues të Zyrës Arsimore të Gjirokastrës. Deri tani, prokuroria ka ngritur një akuzë për humbje jete, por ende nuk ka arritur të përcaktojë tërësisht arsyet që çuan në tragjedinë e kësaj adoleshenteje.

Letra që zbulon dhimbjen e thellë të viktimës

Në sendet personale të vajzës, familjarët gjetën një letër të shkruar në anglisht, në të cilën ajo shprehte dhimbjen dhe ndjenjën e izolimit nga shoqëria. Në letër, 17-vjeçarja ngre pyetjen “Pse më bullizojnë mua?”, duke dhënë një sinjal të qartë për mundësinë e bullizmit që mund të ketë ndikuar në vendimin e saj tragjik. Kjo ka shtuar dyshimet për faktorët e jashtëm që mund të kenë ndikuar në jetën e vajzës dhe ka nxitur kërkesa për masa më të forta kundër bullizmit në shkolla.
Në letrën e saj, viktima përshkruante ndjenjat e saj të dhimbjes dhe dëshirës për të përfituar nga shoqëria, duke treguar se nuk ndihej e pranuar dhe kishte vështirësi të krijonte lidhje me bashkëmoshatarët. Për më tepër, ajo shprehte dëshirën për t’u veshur si shoqet e saj dhe për të pasur veshje më të bukura.

Një tjetër faktor që ka rënduar situatën është gjendja e vështirë ekonomike e familjes së vajzës. I ati, pas një aksidenti në punë, kishte mbetur i papunë për vite me radhë, duke përkeqësuar më tej pasiguritë financiare dhe emocionale të familjes. Ky aspekt i jetës së vajzës mund të ketë kontribuar në ndjenjat e pasigurisë dhe trishtimit që ajo ndiente.

Hetimet dhe debati mbi bullizmin

Ngjarja ka ringjallur debatin në lidhje me bullizmin në shkolla dhe mungesën e mekanizmave mbështetës psikologjikë për nxënësit. Autoritetet vazhdojnë hetimet për të zbuluar nëse ka pasur faktorë të jashtëm që kanë ndikuar në këtë tragjedi dhe për të përcaktuar përgjegjësitë, ndërsa vazhdojnë të merren në pyetje njerëzit që mund të kenë pasur lidhje me vajzën dhe jetën e saj shoqërore.