Vdes Enver Duriqi, të cilit iu vranë katër fëmijë në masakrën në Podujevë

Ka vdekur Enver Duriqi, të cilit më 28 mars 1999 i ishin vrarë katër fëmijët, gruan dhe prindërit, në masakrën ndaj familjeve Duriqi, Bogujevci dhe Llugaliu në Podujevë.

Lajmi për vdekjen e Duriqit u dha nga Fondi për të Drejtën Humanitare në Kosovë, që Duriqin e quajti zë të së vërtetës dhe drejtësisë.

Duriqit më 28 mars në këtë masakër i ishin vrarë fëmijët e moshave 3, 5, 8 dhe 10-vjeç. Pas luftës kishte filluar jetën e re dhe kishte sërish katër fëmijë, e të cilëve ua kishte lënë emrat e njëjtë sikur të të vrarëve.

“Me dhimbje dhe respekt të thellë ndahemi nga Enver Duriqi, një njeri i cili, përkundër tragjedisë së pamasë që përjetoi, nuk reshti së luftuari për drejtësi dhe të vërtetën. Gjatë luftës, ai humbi gjithçka – katër fëmijët, bashkëshorten dhe të dy prindërit, të vrarë mizorisht. Megjithatë, kjo humbje nuk e theu shpirtin e tij, por përkundrazi, e bëri edhe më të vendosur që të kërkonte drejtësi për viktimat dhe të ndihmonte që zëri i tyre të mos shuhej kurrë”, thuhet në njoftimin e FDH-së.

Nga FDH-ja Duriqi është cilësuar jo vetëm si dëshmitar i së kaluarës së dhimbshme, por edhe si simbol i palëkundur i qëndresës dhe drejtësisë.

Në masakrën ndaj tri familjeve në Podujevë ishin vrarë 16 persona.