Makron pas takimit në Londër: Propozojmë armëpushim prej një muaji në Ukrainë

Presidenti francez Emmanuel Macron deklaroi se plani francezo-britanik për Ukrainën përfshin një ndërprerje të luftës prej një muaji në ajër, në det dhe në infrastrukturën energjetike. Ai theksoi se do të jetë e vështirë të konfirmohet nëse ndërprerja e zjarrit do të respektohet për shkak të distancave të mëdha të frontit në Ukrainë.

Macron shtoi se nuk do të dërgohen paqeruajtës evropianë në Ukrainë në javët e ardhshme, derisa të zhvillohen bisedimet për paqen. Ai gjithashtu shprehu dyshime për efektivitetin e bisedimeve mes SHBA-ve dhe Rusisë, duke theksuar se Rusia do të përpiqet ta “poshtërojë” Ukrainën.

Në Londër, kryeministri britanik Keir Starmer prezantoi një strategji katërpikëshe për të mbështetur Ukrainën, e cila përfshin vazhdimin e ndihmës ushtarake, shtimin e presionit ekonomik mbi Rusinë, forcimin e kapaciteteve mbrojtëse të Ukrainës dhe krijimin e një koalicioni për mbështetje të paqes.

Samiti në Londër theksoi mbështetje të fortë për Ukrainën, ku presidenti ukrainas Volodymyr Zelensky theksoi se Ukraina ndjen “mbështetje të fortë” dhe se samiti shfaqi “unitet evropian në një nivel shumë të lartë që nuk është parë për një kohë të gjatë.”