Izraeli do të mbajë kontrollin ushtarak të Gazës, thotë Netanyahu

Kryeministri Benjamin Netanyahu deklaroi se Izraeli do të mbajë kontrollin ushtarak mbi Rripin e Gazës dhe nuk do të lejojë që Autoriteti Palestinez të zëvendësojë sundimin e Hamas-it pas luftës.

Ndër të tjera, Netanyahu përshkroi kundërshtimin e administratës Biden ndaj ofensivës së Izraelit në Gaza vitin e kaluar.

“Ne nuk do t’i nënshtrohemi asnjë presioni për të mos e bërë këtë”, tha Netanyahu në lidhje me planet e Izraelit për sundim ushtarak në Gaza në një konferencë të organizuar nga Sindikata e Lajmeve Hebraike (JNS) në Jerusalem.

Ai shtoi se arsyeja e vetme pse Izraeli nuk po shkatërron “mbetjet” e batalioneve të mbetura të Hamas-it është për shkak të pengjeve.

Duke iu drejtuar konferencës, Netanyahu tha: “Ne duhet ta përfundojmë luftën në Gaza, të marrim pengjet tona dhe të shkatërrojmë Hamas-in”.

Ai gjithashtu vlerësoi planin e Presidentit të SHBA-ve Donald Trump për atë që e përshkroi si “zhvendosje vullnetare” e palestinezëve nga Rripi i Gazës: “Më besoni, shumë prej tyre duan të largohen”, shtoi Netanyahu.

Gjatë fjalimit të tij në konferencë, Netanyahu tha se sulmi i 7 tetorit supozohej të koordinohej me një sulm edhe nga Libani, dhe se qëllimi ishte “në thelb të zhdukej Izraeli”.