Masakra me 3 viktima në Palermo, 19-vjeçari shkon në polici dhe bën deklaratën e çuditshme

Policia italiane ka arrestuar një 19-vjeçar, pasi ka deklaruar se është një nga autorët e masakrës në Palermo që iu mori jetën 3 personave.

Ai u ndalua nga karabinierët e njësisë hetimore të grupit të Palermos pasi ishte paraqitur në stacionin e policisë për të denoncuar vjedhjen e skuterit të tij.

Një version që nuk i kishte bindur autoritetet. Kështu, Salvatore Calvaruso, një i ri 19-vjeçar, u arrestua dhe u dërgua në burg. Pas disa orësh, erdhi rrëfimi: “Po, unë qëllova me armë në Monreale.

Mendohet se ai është një nga dy djemtë nga lagjja Zen, të cilët natën e së shtunës në Monreale vranë Salvatore Turdo, 23 vjeç, Andrea Miceli dhe Massimo Pirozzo, të dy 26 vjeç. Urdhri për ndalim si i dyshuar për krim ishte lëshuar nga prokuroria e Palermos. Akuzat janë për masakër, mbajtje të paligjshme dhe posedim të armës së zjarrit.

Më pas, pas pranimit të fajit, i riu gjatë marrjes në pyetje vendosi të përfitojë nga e drejta për të mos u përgjigjur. Nën hetim është edhe një i ri i dytë, që dyshohet të ketë pasur një rol kyç në të shtënat. Në vendin e ngjarjes u gjetën 18 gëzhoja, të qëlluara nga dy pistoleta të ndryshme.

“Deklaratat vetëakuzuese të dhëna nga i dyshuari janë plotësisht të mbështetura nga pamjet e kamerave të sigurisë, të marra nga bizneset në zonën pranë vendit ku ndodhën ngjarjet”, shkruan prokurori në urdhrin e ndalimit të Salvatore Calvaruso.

I riu ka deklaruar se gjatë sherrit që shkoi në të shtëna, ai kishte humbur syzet e tij në zonën ku ndodhën ngjarjet. Dhe pikërisht aty karabinierët gjetën syzet që përputhen në mënyrë të përkryer me ato që Calvaruso kishte veshur dhe përdorur, siç vërtetohet nga një foto e marrë nga rrjetet sociale. Sipas prokurorit, kjo është një provë objektive dhe individualizuese që lejon me arsye të vendoset prania e të dyshuarit në vendin e ngjarjes.

Calvaruso është identifikuar gjithashtu nga dy persona që kanë konfirmuar praninë e tij në vendin e masakrës.

Sherri dyshohet të ketë nisur nga një vërejtje e parëndësishme për mënyrën se si disa të rinj po qarkullonin me skuterët e tyre.

“Çfarë bëni? Si dreqin po ngisni?”. Fjalë që për grupin e të rinjve të ardhur në Monreale nga lagjja Zen e Palermos, tingëlluan si fyerje. Nga aty nisi sherri me shtyrje, fjalë të rënda dhe grushte. Fluturuan edhe karrige e shishe e në fund, të shtënat.