Po drekonte në një restorant peshku, vritet në atentat politikani në Meksikë

Një politikan meksikan vendas u qëllua për vdekje të hënën, ndërsa po darkonte në një restorant peshku në shtetin e trazuar Jalisco në perëndim të Meksikës, thanë autoritetet.

Jose Luis Pereira, një anëtar i lartë i qeverisë së qytetit Teocaltiche, u sulmua rreth orës 5 të pasdites në një restorant me ushqime deti, sipas zyrës së prokurorit lokal.
“Oficerët e policisë iu përgjigjën vendit të ngjarjes pasi morën një raport për një person të plagosur nga një armë zjarri”, tha zyra e prokurorit në një deklaratë . “Me të mbërritur, së bashku me personelin mjekësor, oficerët konfirmuan se personi nuk kishte më shenja jetësore”

Qyteti dhe rajoni përreth kanë parë shpërthime dhune në muajt e fundit. Vetëm disa ditë më parë, një nënë që kërkonte të afërm të zhdukur u vra së bashku me djalin e saj në Jalisco.

Shefi i policisë bashkiake të shtetit u vra më 15 prill ndërsa në mars, një avokat që drejtonte një faqe lajmesh lokale në Facebook u vra në shtetin fqinj Guanajuato në atë që prokurorët e shtetit e quajtën një krim “kundër lirisë së shprehjes”.

Mediat lokale raportuan gjithashtu në shkurt se eshtrat e katër oficerëve të policisë së Teocaltiche u gjetën në qese plastike përgjatë një rruge, pasi tetë oficerë u zhdukën së bashku me një shofer që i çoi ata në Guadalajara-n aty pranë.

Pas rrëmbimeve, policia qëndrore mori kontrollin e policisë së Teocaltiche, duke akuzuar forcat lokale të rendit se ishin infiltruar nga bandat.

Meksika Perëndimore është shtëpia e kartelit Jalisco New Generation, i cili u shpall organizatë terroriste nga Presidenti i SHBA-së Donald Trump në shkurt.

Dhuna e lidhur me grupet e trafikimit të drogës është rritur ndjeshëm në Meksikë në dekadat e fundit, me rreth 480,000 njerëz të vrarë në 19 vitet e fundit.

Më shumë se 124,000 njerëz janë regjistruar zyrtarisht si të zhdukur në Meksikë, dhe Jalisco kryeson statistikat kombëtare me më shumë se 15,000 raste.

Politikanët janë shënjestruar nga dhuna në Meksikë

Kartelet e drogës në Meksikë shpesh kanë përqendruar përpjekjet për vrasje të politikanëve dhe kandidatëve për kryetarë bashkie, në një përpjekje për të kontrolluar policinë lokale ose për të zhvatur para nga qeveritë komunale.

Në dhjetor 2024, një kongresmen meksikan i cili ishte anëtar i koalicionit qeverisës u qëllua për vdekje në shtetin Veracruz.

Rreth dy muaj më parë, një kryetar bashkie u vra dhe iu pre koka në shtetin jugor të Guerreros. Muajin tjetër, një ish-prokuror dhe zyrtar i policisë lokale u arrestua në lidhje me vrasjen e tmerrshme.

Në qershor të vitit 2024, një kryetar bashkie u vra në Meksikën jugore, më pak se një javë pasi një politikan tjetër u vra në të njëjtin rajon të prekur nga dhuna e karteleve.

Po atë muaj, një këshilltare lokale u qëllua për vdekje teksa po dilte nga shtëpia e saj në Guerrero. Vrasja e saj ndodhi disa ditë pasi kryebashkiaku i një qyteti në Meksikën perëndimore dhe truproja e saj u vranë jashtë një palestre , vetëm disa orë pas fitores historike presidenciale të Claudia Sheinbaum.

Në mars të vitit 2024, një kryetar bashkie u qëllua për vdekje ndërsa ishte në një restorant me djalin e tij 14-vjeçar në Morelia, kryeqytetin e shtetit perëndimor të Michoacan. Djali i tij mbijetoi.