Roma merr fitore të madhe ndaj Fiorentinës, mbanë gjallë shpresat për Ligën e Kampionëve

Goli i Artem Dovbyk dhe një seri pritjesh spektakolare nga Mile Svilar i dhanë fitoren Romës ndaj Fiorentinës, duke forcuar pretendimet e skuadrës së Claudio Ranierit për një vend në top katër të Serie A.

Kjo ishte një përballje direkte mes dy skuadrave që luftojnë për pjesëmarrje në Ligën e Kampionëve. Me sezonin për Paulo Dybala të mbyllur, Giallorossët përdorën të njëjtin formacion që mposhti Interin javën e kaluar. Ndërkohë, Fiorentina, mes dy ndeshjeve të gjysmëfinales së Conference League kundër Real Betis, bëri rotacione, duke rikthyer Moise Kean dhe ish-lojtarin e Romës, Nicoló Zaniolo. Luca Ranieri ishte i pezulluar, ndërsa Dodo dhe Danilo Cataldi të dëmtuar. Një moment i ndjeshëm ndodhi kur Edoardo Bove, produkt i akademisë së Romës, u rikthye për herë të parë në “Olimpico” pas problemeve kardiake.

Pas disa tentativave nga distanca nga Pellegrini dhe Richardson, rasti i parë i madh erdhi pas 27 minutash, kur Kean kaloi Celik dhe u përball me Svilar, i cili reagoi shkëlqyeshëm. Pak më vonë, Kean goditi fort në kënd të ngushtë, por sërish Svilar bëri një pritje të shkëlqyer me njërën dorë.

Në anën tjetër, Celik rrezikoi me një goditje të fuqishme që De Gea e devijoi mbi traversë, dhe më pas priti edhe goditjen me kokë të Mancinit nga këndi.

Kean sërish rrezikoi me një gjuajtje drejt Svilar, por në fund të pjesës së parë ishte Roma që kaloi në avantazh. Pas një pritjeje fluturimthi nga De Gea ndaj Shomurodov, në këndin që pasoi, Shomurodov e zbriti topin për krosimin e Angelinos, të cilin Dovbyk e shënoi me një goditje me kokë në shtyllën e dytë. Fiorentina protestoi duke pretenduar se minuta shtesë ishte tejkaluar.

Në pjesën e dytë, De Gea ndaloi një tjetër goditje nga distanca të Manu Kone, ndërsa Zaniolo shpërdoroi një rast të artë brenda zonës. Fiorentina shtoi presionin, por Svilar ishte sërish vendimtar – fillimisht me një pritje me këmbë ndaj Mandragorës dhe më pas me një tjetër pritje të dyfishtë ndaj Kean, duke ruajtur avantazhin deri në fund.

Një fitore me vlera të mëdha për Romën, që tani është më pranë objektivit të saj për një vend në Ligën e Kampionëve.