Zbulohet klubi i Premierligës që Cristiano Ronaldo nuk do t’i bashkohej kurrë – dhe nuk është Liverpool

Cristiano Ronaldo, tashmë 40 vjeç dhe pjesë e skuadrës saudite Al-Nassr, thuhet se i ka thënë njërit prej ish-shokëve të tij te Manchester United se “nuk do të shkonte kurrë” te një klub i caktuar i Premier League – dhe nuk bëhet fjalë për Liverpool-in, rivalin tradicional të “Djajve të Kuq”.

Ronaldo ka pasur dy periudha me Manchester United: nga 2003 deri në 2009 dhe përsëri nga 2021 deri në 2022, duke shënuar 103 gola dhe 49 asistime në 206 paraqitje në Premier League. Ai ndihmoi klubin të fitojë tre tituj radhazi (2006/07, 2007/08, 2008/09), përpara se të transferohej te Real Madrid, ku njohu kulmin e karrierës së tij.

Në verën e vitit 2021, Ronaldo kishte disa opsione në tavolinë, përfshirë një transferim të mundshëm te Manchester City. Vetë portugezi ka pranuar në një intervistë për Piers Morgan (TalkTV) se gjithçka ishte shumë afër, por ndërhyrja e legjendës Sir Alex Ferguson e ndryshoi vendimin:

“Ishte shumë afër… Guardiola e konfirmoi që më donin shumë. Por fola me Sir Alex-in dhe ai më tha: ‘Është e pamundur që të shkosh te City.’ Dhe unë thashë, ‘OK, Boss’. Ishte një vendim i mirë.”

Megjithatë, një tjetër detaj interesant është zbuluar nga Patrice Evra, ish-mbrojtës i United dhe mik i ngushtë i Ronaldos. Në një intervistë për RMC Sport, Evra zbuloi se Ronaldo kishte shqyrtuar mundësinë për t’u transferuar te Paris Saint-Germain, Chelsea apo Juventus në vitin 2018, kur ishte ende te Real Madrid.

Por Arsenali ishte klubi që Ronaldo nuk do ta konsideronte kurrë.

“A ka dashur ndonjëherë Cristiano të vijë te PSG? Po. Kishte interes nga Parisi, Chelsea, Juventusi… por ai tha se nuk do të shkonte kurrë te Arsenali,” tha Evra.

“Ai ishte i interesuar për projektin e PSG-së. Mund ta kritikosh Cristianon, por ai do të përshtatej. Do të bënte përpjekje. Shikoni çfarë po bën në Arabinë Saudite – është bërë saudit!”