Irani ndërpret bisedimet bërthamore me SHBA-në pas sulmeve izraelite

Irani njofton se ka pezulluar negociatat bërthamore me SHBA-në pas sulmeve të Izraelit, transmeton Anadolu.

“Irani nuk do të marrë pjesë në bisedimet indirekte bërthamore me SHBA-në, të cilat ishin planifikuar të mbaheshin në kryeqytetin e Omanit më 15 qershor”, njoftoi televizioni shtetëror iranian.

Raportohet se bisedimet, të cilat nuk mund të mbaheshin për një kohë për shkak të këmbënguljes së SHBA-së që Irani të ndalojë plotësisht aktivitetet e pasurimit të uraniumit, duhej të rifillonin në Oman më 15 qershor.

Sot në orët e para të mëngjesit, Izraeli nisi sulme ndaj Iranit, përfshirë kryeqytetin Teheranin, Tabrizin, centralin bërthamor Natanz në Isfahan dhe qytetet Lorestan dhe Kermanshah.

Sulmet vranë zyrtarë të lartë ushtarakë, përfshirë shefin e Shtabit të Iranit, gjeneral major Mohammad Bagheri, komandantin e përgjithshëm të korpusit të Gardës Revolucionare, gjeneral major Hossein Salami dhe shkencëtarë bërthamorë.

Vendbanimet civile u goditën gjithashtu gjatë sulmeve të Izraelit në Teheran dhe shumë civilë humbën jetën.