Çështja e mosvendosjes së mbishkrimeve në gjuhën shqipe në Mega Parkun e Komunës së Butelit ishte ditë më parë në qendër të përplasjes mes këshilltarëve shqiptarë dhe atyre maqedonas, ku më pas debatit iu bashkua edhe kryetari i komunës.

Lidhur me këtë çështje, këshilltari i AKI-së, Armend Mureseli, në një prononcim për TS, deklaroi se nuk i frikësohet askujt, duke theksuar se kërkesa e tyre është vetëm respektimi i Ligjit për Përdorimin e Gjuhëve.

“Ne nuk i frikësohemi askujt dhe nuk ka arsye për t’u frikësuar, sepse nuk kërkojmë asgjë më shumë përpos respektimit të ligjit për gjuhët. Ai që nuk e respekton ligjin, ai duhet të frikësohet”, u shpreh Mureseli për TS.

Ai shprehu kënaqësinë për reflektimin e këshilltarëve të VLEN-it pas 17 seancave, duke theksuar se bashkëpunimi mes tyre do të vazhdojë deri në realizimin e të drejtave të shqiptarëve në Komunën e Butelit.

“Mua më vjen mirë që pas 17 seancave, këshilltarët e VLEN-it reflektuan dhe ne do të bashkëpunojmë me ta deri në përmbushjen e të drejtave të shqiptarëve në Komunën e Butelit. Ne kemi qenë për bashkëpunim që nga dita e parë dhe do të vazhdojmë për kauzën tonë kombëtare”, shtoi ai.

Mureseli bëri të ditur gjithashtu se, pas kërkesës së dorëzuar nga këshilltarët e AKI-së, Inspektorati për Përdorimin e Gjuhëve të premten ka realizuar inspektim në Komunën e Butelit, përfshirë edhe Mega Parkun dhe parkun e Butelit.

Sipas tij, kërkesa është që tabelat e vendosura vetëm në gjuhën maqedonase të plotësohen edhe me mbishkrime në gjuhën shqipe.

Ne përdorim cookies për të përmirësuar përvojën tuaj dhe për të analizuar trafikun në faqe. Duke vazhduar përdorimin e faqes, ju pranoni përdorimin e cookies sipas Politikës së Privatësisë. Pranoj Me shume