Meta akuzon Endrit Braimllarin për lobimin e LSI: Qëndroj në burg për firmat e tij

Presidenti i Partisë së Lirisë, Ilir Meta, ka reaguar ashpër përmes një postimi në rrjetet sociale, duke akuzuar ish-sekretarin e përgjithshëm të LSI-së, Endrit Braimllari, për përgjegjësi të drejtpërdrejtë në çështjen e lobimit, që aktualisht po hetohet nga SPAK.

Meta shprehet se po mbahet në “izolim ekstrem” për shkak të firmave të hedhura nga Braimllari në emër të LSI-së gjatë periudhës 2018–2019, kohë kur ai ishte President i Republikës dhe jo kryetar i partisë.

“Vetëm një rilindas mund të harrojë firmat që ka hedhur vetë dhe arsyet për të cilat i ka hedhur. Një gënjeshtar ordiner, që përpiqet të fshihet pas harresës,” shkruan Meta.

Meta thekson se dokumentet e SPAK, e faktojnë Braimllarin si personin përgjegjës për firmosjen e kontratave të lobimit dhe ironizon faktin që ndërsa ai përballet me izolim, Braimllari “gradohet” në postin e nënkryetarit të Këshillit Bashkiak të Tiranës.

Postimi i Metës:

Endrit Braimllari është shembulli më i gjallë i mënyrës se si SPAK-u arrin t’i konvertojë njerëzit pa karakter në “rilindas” të denjë – gënjeshtarë. Vetëm një “rilindas” mund të harrojë firmat që ka hedhur vetë dhe arsyet për të cilat i ka hedhur. Një gënjeshtar ordiner, që përpiqet të fshihet pas harresës, por e vërteta nuk fshihet as me lojëra fjalësh, as me konvertim teserash partie. Firma për lobimet e LSI-së në periudhën 2018–2019 është e Endrit Braimllarit. Në atë kohë, unë nuk isha kryetar i LSI-së, por President i Republikës. Për firmat e tij unë qëndroj në izolim ekstrem, ndërsa Endriti “gradohet” nënkryetar i Këshillit Bashkiak të Tiranës. Apo mos ndoshta është Altin Dumani që gënjen në shkresën zyrtare të firmosur prej tij?