Mexhiti: Brezi i Manastirit përmbushi detyrën e tij, përgjegjësia jonë është të sigurojmë arsim cilësor në gjuhën shqipe
Kryetari i Komunës së Çairit, Izet Mexhiti, mori pjesë në Konferencën Shkencore Ndërkombëtare “Ditët e Alfabetit”, të organizuar nga Instituti i Trashëgimisë Shpirtërore e Kulturore të Shqiptarëve (ITShKSh), ku në qendër të diskutimeve ishte cilësia e teksteve shkollore dhe përgjegjësia institucionale për avancimin e arsimit në gjuhën shqipe, 118 vjet pas Kongresit të Manastirit.
“Dita e Alfabetit na kthen te Manastiri i vitit 1908, por njëkohësisht na përball me përgjegjësinë që kemi sot për cilësinë e arsimit në gjuhën shqipe. Një libër shkollor është ndër takimet e para të fëmijës me gjuhën e shkruar, shkencën dhe historinë, prandaj duhet të jetë i saktë, i qartë dhe i kuptueshëm. Hartimi, përkthimi dhe vlerësimi i teksteve kërkojnë angazhim serioz profesional, ku mësimdhënësit, pedagogët, gjuhëtarët dhe ekspertët duhet të kenë rol të drejtpërdrejtë”, theksoi Mexhiti.
Ai nënvizoi se përmirësimi i kushteve në shkolla dhe forcimi i bashkëpunimit me institucionet arsimore e shkencore mbeten përgjegjësi të drejtpërdrejta të udhëheqësve institucionalë. Sipas tij, rekomandimet profesionale duhet të gjejnë zbatim konkret në procesin mësimor, duke krijuar kushte për zhvillimin e mendimit kritik dhe përvetësimin e njohurive cilësore. “Brezi i Manastirit përmbushi detyrën e kohës së vet. Detyra jonë është t’u sigurojmë fëmijëve arsim cilësor në gjuhën shqipe dhe mundësi për të ecur përpara përmes dijes”, përfundoi Mexhiti.









