Inteligjenca Artificiale po rrënon portalet e lajmeve

Kompanitë e lajmeve janë paralajmëruar për një “ndikim shkatërrues” në audiencën online, pasi rezultatet e kërkimit po zëvendësohen nga përmbledhjet e Inteligjencës Artificiale (AI). Kështu raporton The Guardian, duke shtuar se një studim i ri pohoi se shkakton deri në 80 për qind më pak klikime. Kërcënimi që paraqesin Përmbledhjet e Inteligjencës Artificilae të Google, të cilat përmbledhin një rezultat kërkimi me një bllok teksti, është rritur me shpejtësi në krye të shqetësimeve midis pronarëve të mediave, sipas gazetës britanike. Disa e shohin atë si një kërcënim ekzistencial për mediat që mbështeten në trafikun e rezultateve të kërkimit.

Përmbledhjet e AI-t mund t’u japin përdoruesve të gjithë informacionin që kërkojnë pa klikuar kurrë te burimi origjinal i përmbajtjes. Ndërkohë, lidhjet e rezultateve të kërkimit shtyhen më poshtë faqes, duke ulur numrin e përdoruesve që i gjejnë ato.

Një analizë e re nga kompania analitike Authoritas ka zbuluar se një faqe interneti e renditur më parë e para në një rezultat kërkimi mund të humbasë rreth 79 për qind të trafikut të saj për atë pyetje nëse rezultatet dorëzoheshin nën një përmbledhje të AI-t. Hulumtimi është paraqitur si pjesë e një ankese ligjore drejtuar organit mbikëqyrës të konkurrencës në Mbretërinë e Bashkuar në lidhje me ndikimin e Google AI Overviews. Një zëdhënës i Google tha në një deklaratë se studimi ishte “i pasaktë dhe i bazuar në supozime dhe analiza të gabuara”, duke përdorur vlerësime të vjetruara dhe një sërë kërkimesh që nuk përfaqësonin të gjitha pyetjet që do të gjeneronin trafik për faqet e internetit të lajmeve.