Tajvani vihet në lëvizje, do të ndërtojë një kupolë mbrojtëse ajrore

Presidenti i Tajvanit, William Lai, njoftoi planin për ndërtimin e një sistemi mbrojtës ajror në formë kupole për t’u mbrojtur nga kërcënimet armiqësore, pas paralajmërimeve të qeverisë që Kina po rrit aftësitë për të sulmuar ishullin.

Lai nuk e përmendi drejtpërdrejt Kinën, por njoftimi vjen në një kohë kur tensionet mes dy shteteve janë rritur, dhe Pekini ka shprehur vazhdimisht pretendimet për Tajvanin.

Plani i Tajvanit është të ndërtojë një sistem mbrojtës ajror “T-Dome”, i ngjashëm me sistemin izraelit të Kupolës së Hekurt, i cili është përdorur me sukses për të mbrojtur Izraelin nga raketat me rreze të shkurtër veprimi.

T-Dome do të krijojë një “rrjet sigurie” për të mbrojtur qytetarët nga sulme ajrore, duke përdorur mbrojtje shumështresore dhe teknologji të avancuar për zbulim dhe përgjim.

Ky plan është shpallur disa javë pasi Kina intensifikoi stërvitjet ushtarake në ujërat dhe hapësirën ajrore të Tajvanit, përfshirë simulime të mundshme të një pushtimi.

Lai po nxit rritjen e shpenzimeve për mbrojtjen, duke i kushtuar më shumë se 3% të PBB-së vitin e ardhshëm dhe duke planifikuar të arrijë deri në 5% deri në vitin 2030.

Sidoqoftë, ky plan mund të hasë pengesa në legjislaturën e kontrolluar nga opozita, e cila ka bllokuar disa projektligje për shpenzimet në vitin 2025.

Kritikët e Lai e akuzojnë se ai po përdor frikën e një sulmi kinez për të forcuar mbështetje politike dhe se duhet të bëhen përpjekje më të mëdha për diplomaci me Pekinin.

Nga ana tjetër, ministria e mbrojtjes e Tajvanit ka theksuar se Kina mund të shndërrojë stërvitjet në sulme të vërteta, duke kapur ishullin në befasi.