Kuvendi i Studentëve i UT-së organizoi aksion për dhurimin e gjakut

Kuvendi i Studentëve të Universitetit të Tetovës, prej 22 – 26 dhjetor 2025, organizoi aksion për dhurimin vullnetar të gjakut me pjesëmarrjen e studentëve dhe stafit akademik nga secili fakultet i Universitetit të Tetovës.
Iniciatorë të kësaj nisme ishin Instituti i Transfuziologjisë, Kryqi i Kuq dhe Kuvendi i Studentëve. Aktiviteti u përkrah edhe nga udhëheqësia e Universitetit, drejtori i Transfuziologjisë Dr. Amir Elezi, Dr. Goran Andonov, Dr. Ekrem Ismani dhe i gjithë stafi i Institutit të Transfuziologjisë. Në këtë aktivitet morën pjesë edhe Prorektori për Shkencë Prof. Dr. Vullnet Ameti, Prorektori për Arsim Prof. Dr. Ibrahim Neziri, dekani i Fakultetit Filozofik Prof. Dr. Kushtrim Ahmeti dhe Prof. Dr. Agon Memeti.
Kryetari i Kuvendit Studentor Leart Ibraimi u shpreh se mënyra më e mirë për ta përfunduar një vit kalendarik është vullneti për të ndihmuar, veçanërisht në çështje shëndetësore. Dhurata e studentëve këtë vit është dhurimi i gjakut nga të gjitha grupet dhe kjo dhuratë do të pranohet nga ata që kanë më së shumti nevojë.
Universiteti i Tetovës aktivitete të tilla ka organizuar edhe më parë, duke dëshmuar vazhdimisht përkushtimin ndaj solidaritetit dhe kujdesit shëndetësor të komunitetit.