Shefi i Saudi Pro League, “Mohamed Salah është i mirëpritur në Arabinë Saudite”

E ardhmja e Mohamed Salah te Liverpool është vënë seriozisht në dyshim, ndërsa skuadrat e Arabisë Saudite po ndjekin me vëmendje situatën e tij. Pas intervistës kontroverse të fundjavës dhe lënies jashtë skuadrës në ndeshjen e Ligës së Kampionëve ndaj Interit, sulmuesi egjiptian shihet gjithnjë e më pranë një largimi.

Shefi ekzekutiv i Saudi Pro League, Omar Mugharbel, ka deklaruar se Salah do të ishte “i mirëpritur” në kampionat, teksa klubet saudite vazhdojnë të kërkojnë yje të mëdhenj për rritjen e profilit të ligës.

“Mohamed Salah është i mirëpritur në ligën saudite, por klubet janë ato që negociojnë me lojtarët. Pa dyshim, ai është një prej tyre,” u shpreh Mugharbel për Asharq Al-Awsat.

Salah, i cili sezonin e kaluar udhëhoqi Liverpoolin drejt titullit dhe fitoi çmimin PFA Lojtari i Vitit, këtë vit ka pësuar rënie forme dhe duket i pakënaqur me trajtimin nga trajneri Arne Slot.

Në vitin 2023, Liverpool refuzoi një ofertë prej 150 milionë funtesh nga Al-Ittihad, por një lëvizje në janar tanimë duket e mundshme.

Interesi saudit për Salah mbetet i fortë, dhe spekulimet për një transferim të madh mund të intensifikohen në javët në vijim.