Sindikatat nisin bllokadat: Më 10 shkurt rrethohet Kuvendi, kërkohet rritja e pagës minimale në 600 euro

Kryetari i Lidhjes së Sindikatave të Maqedonisë, Sllobodan Trendafilov, informoi sot se të martën e ardhshme sindikatat do të bllokojnë deputetët, ndërsa më pas do të pasojnë aktivitete të drejtuara ndaj punëdhënësve – Odës Ekonomike, Lidhjes së Odave Ekonomike dhe Organizatës së Punëdhënësve.

​“10 shkurt – Kuvendi, 12 shkurt – pronarët (OE, OPM, LOM), 17 shkurt – Qeveria”, thuhet në njoftimin e shkurtër të kryesindikalistit të vendit.

​Nga LSM-ja kujtojnë se dje ka skaduar afati që u ishte dhënë institucioneve për të bërë ndryshime urgjente në Ligjin për pagën minimale, me të cilat paga minimale do të rritej në 600 euro, ndërsa të gjitha pagat e tjera për të paktën 6.000 denarë. Duke qenë se, siç thonë ata, nuk ka pasur asnjë përgjigje konkrete, sindikatat kanë vendosur të intensifikojnë presionet.
​”Sipas të gjitha gjasave, javën tjetër ata (deputetët) do të duhet të vijnë me autobus ose në këmbë, ashtu siç vijnë shumica e punëtorëve. Do t’i presim për t’i përshëndetur dhe për t’i kujtuar se janë aty për ne dhe se duhet të votojnë. Ky do të jetë hapi i radhës, ndërsa detajet do t’i shpallim të hënën. Atë ditë nuk do të mund të arkëtojnë shpenzime rruge. Do t’i godasim në xhep,” tha javën e kaluar kryetari i LSM-së duke iu referuar deputetëve.