Gjermania ka punëtorët më të vjetër në BE

Punëtorët gjermanë janë më të moshuarit në Bashkimin Evropian, sipas statistikave zyrtare. Të dhënat e Eurostat zbulojnë se asnjë vend tjetër në BE nuk ka një përqindje më të lartë të punonjësve midis moshës 55 dhe 64 vjeç, e cila në Gjermani është 24 përqind, raporton agjencia Dpa.

Përqindja mesatare e të punësuarve të moshës 55 deri në 64 vjeç në BE është 20 përqind, ndërsa në disa vende, si Malta, kjo përqindje është e ulët dhe arrin vetëm në 11 përqind, raportoi Zyra Federale Gjermane e Statistikave.

Italia, me 23 përqind, dhe Bullgaria, me 22.3 përqind, kanë gjithashtu një pjesë mbi mesataren e popullsisë së moshuar që punon, shkruan Dpa.

Një nga arsyet e rëndësishme për këtë trend është popullsia në plakje në Gjermani. Përveç kësaj, njerëzit po dalin në pension mesatarisht më vonë.

Të dhënat nga Fondi i Sigurimeve Pensionale të Gjermanisë tregojnë se punonjësit dolën në pension në një moshë mesatare prej 64.7 vjeç në vitin 2024, nga 63 vjeç dy dekada më parë.

Ndërkohë, mosha ligjore e daljes në pension u rrit gradualisht dhe qeveria hoqi programet e daljes në pension të parakohshëm.

Plakja e popullsisë së aftë për punë është një problem serioz për ekonominë, e cila mbështetet gjithnjë e më shumë te punëtorët e kualifikuar nga jashtë.

Qeveria e kancelarit Friedrich Merz prezantoi programin e “pensionit aktiv”, i cili u lejon punonjësve të marrin 2,000 euro në muaj pa taksa nëse vazhdojnë të punojnë përtej moshës ligjore të daljes në pension.