Dorëheqja e Keir Starmer, reagojnë liderët botërorë

Liderë botërorë kanë reaguar pas dorëheqjes së kryeministrit të Mbretërisë së Bashkuar, Keir Starmer, mëngjesin e sotëm.

Siç është raportuar, Starmer ka qenë një figurë e rëndësishme në skenën ndërkombëtare gjatë një sërë krizash globale.

Më poshtë disa nga reagimet dhe vlerësimet kryesore:

Presidenti i Ukrainës, Volodymyr Zelensky, e ka falënderuar Starmer për “mbështetjen dhe vendimet e përbashkëta që kanë ndihmuar ta bëjnë Evropën tonë dhe mbrojtjen e jetës më të forta”. Ai shtoi se “çdo takim dhe çdo bisedë me të ka qenë gjithmonë me përmbajtje të vërtetë”.

Presidentja e Komisionit Evropian, Ursula von der Leyen, tha se Starmer ka arritur të bëhet shtetar i nivelit të lartë në vetëm dy vite, duke shtuar se “siguria evropiane dhe ajo e Ukrainës është më e fortë falë jush”, shkruan CNN, transmeton Klankosova.tv.

Presidenti i Këshillit Evropian, António Costa, duke iu referuar përpjekjeve të Starmer për të rregulluar marrëdhëniet MB–BE pas Brexit-it, tha se “kemi hapur një faqe të re në marrëdhëniet BE–MB dhe Bashkimi Evropian mbetet i përkushtuar për bashkëpunim të mëtejshëm në këtë frymë”.

Kryeministri i Australisë, Anthony Albanese, tha se Starmer “mund të jetë krenar për kontributin që ka dhënë për vendin e tij dhe për Partinë Laburiste, të cilën e udhëhoqi sërish në qeveri në vitin 2024”.

Ndërkohë, zëdhënësi i Kremlinit, Dmitry Peskov, tha se Moska “nuk do ta kujtojë për ndonjë gjë të veçantë gjatë mandatit të tij”, duke shtuar se “është pak e mundshme që ndonjë figurë politike në Britani të ketë qëndrim të ndryshëm për marrëdhëniet bilaterale nga Keir Starmer”.