Koha për të folur hapur!
KOHA PËR TË FOLUR HAPUR!
Si ish-President i KF Shkëndija, nuk mund të hesht më për padrejtësitë që klubet shqiptare kanë përjetuar gjatë dekadave.
KF Shkëndija nuk është vetëm një klub futbolli. Shkëndija është histori, identitet, kulturë dhe krenari shqiptare. Është simbol i rezistencës sportive shqiptare nga vitet e 80-ta dhe 90-ta e deri në ditët e sotme.
Shumë prej nesh i kujtojnë ato vite, kur klubet shqiptare përballeshin me presione politike, pengesa administrative dhe ndëshkime të rënda. Shkëndija ishte një nga simbolet më të fuqishme të identitetit sportiv shqiptar dhe pikërisht për këtë arsye shpesh ishte në shënjestër të sistemit. Shumë sportdashës kujtojnë edhe gjobat e rënda që arrinin deri në 100.000 marka, shuma të jashtëzakonshme për atë kohë.
Por për shumë shqiptarë, ato gjoba nuk ishin vetëm ndëshkime financiare. Ato ishin pjesë e një periudhe të errët, kur mbështetja e një klubi shqiptar kërkonte guxim, sakrificë dhe vendosmëri. Ka pasur shqiptarë që janë përballur me presione, burgime, padrejtësi dhe pasoja të rënda vetëm pse mbështesnin klubet shqiptare, vetëm pse mbanin ngjyrat kuqezi dhe vetëm pse nuk hiqnin dorë nga identiteti i tyre kombëtar dhe sportiv.
Për Shkëndijën nuk janë derdhur vetëm mjete financiare. Për Shkëndijën është derdhur djersë, sakrificë dhe gjak. Prandaj, historia e saj nuk mund të matet me gjoba, vendime administrative apo ndëshkime sportive. Shkëndija është ndërtuar mbi sakrificën e mijëra shqiptarëve ndër breza.
Sot, pas më shumë se katër dekadash, lind pyetja:
A kanë ndryshuar vërtet gjërat?
Nëse KF Shkëndija dënohet me mbi 100.000 euro, unë e konsideroj këtë si një nga dënimet më të rënda që i është shqiptuar ndonjëherë një klubi shqiptar. Një vendim i tillë nuk godet vetëm klubin. Ai godet mijëra tifozë, sportistë, të rinj dhe familje që e shohin Shkëndijën si simbol të krenarisë shqiptare.
Kur është dënuar për herë të fundit një klub maqedonas me një gjobë të tillë?
Kur janë zbatuar standarde të njëjta ndaj të gjithëve?
Pse pothuajse gjithmonë klubet shqiptare përballen me ndëshkimet më të rënda?
Federata e Futbollit të Maqedonisë (FFM) dhe institucionet sportive duhet t’u japin përgjigje sportdashësve shqiptarë.
Ku janë investimet në komunat shqiptare?
Ku janë stadiumet moderne?
Ku janë projektet për zhvillimin e sportit shqiptar?
Ku janë kushtet që i meritojnë sportistët shqiptarë?
Ku kanë përfunduar fondet dhe mjetet që për vite me radhë janë ndarë në emër të zhvillimit të futbollit dhe sportit?
Po ashtu shtroj një pyetje shumë serioze:
Ku janë dënimet për thirrjet raciste dhe antishqiptare në stadiume?
Ku janë masat ndaj këngëve nacionaliste që nxisin urrejtje ndaj shqiptarëve?
Ku janë reagimet institucionale kur fyhet identiteti shqiptar para syve të opinionit publik?
Nëse drejtësia zbatohet, ajo duhet të zbatohet për të gjithë.
Vetëm klubet shqiptare nuk mund të jenë objekt i ndëshkimeve shembullore.
Kur krijohet bindja se standardet nuk janë të barabarta, atëherë krijohet zhgënjim, pakënaqësi dhe mosbesim te sportdashësit, si shqiptarë ashtu edhe maqedonas.
Vendime të tilla nuk bashkojnë njerëzit.
Ato krijojnë ndarje, tensione dhe pakënaqësi.
Futbolli duhet të bashkojë, jo të ndajë.
Po ashtu duhet të thuhet qartë:
Pa klubet shqiptare, pa përfaqësuesit shqiptarë dhe pa përkrahjen e komunitetit shqiptar në futboll, nuk mund të ketë një FFM legjitime, përfaqësuese dhe efikase.
Pas vitit 2002, me krijimin e Këshillit Koordinues dhe frymën e Marrëveshjes së Ohrit, u vendosën parime që synonin përfaqësim më të drejtë dhe pjesëmarrje më të barabartë të shqiptarëve në institucionet shtetërore dhe sportive.
Këto parime nuk duhet të mbeten vetëm në letër.
Ato duhet të reflektohen në praktikë, në vendimmarrje, në investime, në përfaqësim dhe në trajtimin e barabartë të klubeve shqiptare.
Klubet shqiptare nuk janë mysafirë në futbollin e Maqedonisë.
Ato janë ndër shtyllat kryesore të futbollit në këtë vend.
Pa klubet shqiptare në nivel lokal, rajonal dhe kombëtar, pa lojtarët, trajnerët, drejtuesit dhe mijëra tifozët shqiptarë, nuk mund të ketë një FFM të fortë, legjitime dhe të respektuar.
Legjitimiteti nuk ndërtohet vetëm me statute dhe vota.
Legjitimiteti ndërtohet me përfaqësim real, barazi, respekt dhe besim.
Federata duhet të jetë në shërbim të klubeve.
Jo klubet në shërbim të federatës.
Ka ardhur koha për transparencë.
Ka ardhur koha për përgjegjësi.
Ka ardhur koha për barazi.
Ka ardhur koha që strukturat e vjetra dhe mentalitetet e vjetra të lëshojnë vend për energji të reja, profesionalizëm dhe drejtësi.
Jo nesër.
Jo pas disa vitesh.
Tani.
Për Shkëndijën.
Për sportin shqiptar.
Për drejtësinë.
Për dinjitetin.
Me respekt,
Samet Rasimi
Ish-President i KF Shkëndija
