Spanja e ‘shkatërron’ Arabinë Saudite, e siguron fitoren e parë në Botëror

Spanja siguroi fitoren e parë në Kupën e Botës 2026, duke mposhtur Arabinë Saudite me rezultat të thellë 4-0 të dielën.

Lamine Yamali u rikthye në formacion dhe hapi ndeshjen me golin e parë, para se dy golat e Mikel Oyarzabal dhe një autogol të siguronin kualifikimin e kampionëve të Europës në fazën me eliminim direkt me një ndeshje të mbetur.

Pas zhgënjimit të barazimit pa gola ndaj Kepit të Gjelbër në ndeshjen e parë, Spanja filloi fuqishëm këtë herë dhe e konkretizoi dominimin e saj shumë shpejt.

Goli i parë erdhi kur Yamali u fut në shtyllën e dytë dhe finalizoi krosimin e fortë të Oyarzabalit.

Vetë Oyarzabali u shfajësua për paraqitjen e dobët të ndeshjes së kaluar me dy gola të shpejtë nga afërsia në pjesën e parë, brenda pak minutash në mesin e saj.

Sulmuesi i Real Sociedadit madje mund të kishte kompletuar hat-trick, por goditja e tij me efekt përfundoi në traversë.

Në pjesën e dytë, Yamali dhe Oyarzabali u zëvendësuan pasi rezultati ishte i sigurt, ndërsa Spanja vazhdoi të kërkonte gola të tjerë.

Goli i katërt erdhi pas një devijimi të Hassan Al Tambakti, pas goditjes së Marc Cucurellas që u prit fillimisht nga portieri.

Më vonë, Pedro Porro rrezikoi me një goditje të fortë, ndërsa Ferran Torresi humbi një rast të artë dhe më pas pati edhe një gol të anuluar nga VAR-i për pozicion jashtë loje.