Federata gjermane ia kërkon dorëheqjen Nagelsmannit

Julian Nagelsmann është pranë largimit nga posti i trajnerit të Gjermanisë pas një takimi vendimtar me Federatën Gjermane të Futbollit (DFB).

Pas eliminimit zhgënjyes nga Kupa e Botës, drejtuesit e federatës i kanë rekomanduar që të japë dorëheqjen vullnetarisht.

Nëse ai refuzon, pritet të shkarkohet zyrtarisht, ndërsa ish-trajneri i Liverpoolit, Jurgen Klopp, konsiderohet si kandidati kryesor për ta zëvendësuar.

Sipas “Sky Sports”, Nagelsmann mori pjesë në një takim tre orë e gjysmë në selinë e Federatës Gjermane të Futbollit (DFB) të enjten.

Në takim ishin të pranishëm presidenti i DFB-së, Bernd Neuendorf, drejtori menaxhues Andreas Rettig, drejtori sportiv Rudi Voller dhe presidenti i Bundesligës, Hans-Joachim Watzke.

Nagelsmannit iu kërkua të shpjegonte fushatën katastrofike të Gjermanisë në Kupën e Botës.

Gjermania e mbylli grupin në vendin e parë pasi mposhti Curacaon me rezultat 7-1 dhe Bregun e Fildishtë me rezultat 2-1, pavarësisht humbjes 2-1 ndaj Ekuadorit.

Megjithatë, ajo pësoi një eliminim tronditës në fazën e 1/16 së finales, duke u mposhtur nga Paraguai pas penalltive, pas barazimit 1-1. Pas një analize shumë të sinqertë të këtij dështimi të hershëm në turne, drejtuesit e federatës e bënë të qartë qëndrimin e tyre, duke i lënë trajnerit shumë pak alternativa për të ardhmen e tij.

DFB i ka rekomanduar fuqishëm Nagelsmannit që të paraqesë dorëheqjen vullnetarisht.

Nëse trajneri vendos të mos largohet vetë, federata tashmë ka përgatitur shkarkimin e tij zyrtar. Nagelsmann mori drejtimin e kombëtares në shtator të vitit 2023 me një kontratë që zgjat deri në vitin 2028.

Gjatë periudhës së tij në krye të ekipit, ai ka drejtuar 37 ndeshje, duke regjistruar 23 fitore, gjashtë barazime dhe tetë humbje. Ky largim i mundshëm sjell kujtime nga puna e tij e mëparshme, pasi ai u shkarkua nga Bayern Munich në mars të vitit 2023 për shkak të rezultateve të dobëta, pas më pak se dy vitesh në detyrë.

Vëmendja është përqendruar menjëherë te pasardhësi i mundshëm, me Jurgen Klopp që shihet si favoriti kryesor për të marrë drejtimin e kombëtares. Klopp nuk ka drejtuar asnjë skuadër që prej largimit nga Liverpooli dy sezone më parë, në maj të vitit 2024.

Gjatë periudhës së tij historike nëntëvjeçare në Angli, Liverpool fitoi disa trofe të mëdhenj nën drejtimin e tij, përfshirë Premierligës dhe Ligën e Kampionëve.

Aktualisht, ai punon si analist i Kupës së Botës për “MagentaTV” dhe mban një rol të rëndësishëm si drejtues i futbollit global në rrjetin Red Bull.

Sigurimi i shërbimeve të tij do të ishte një goditje e madhe për DFB-në, duke sjellë një qasje të re taktike dhe optimizmin shumë të nevojshëm për një bazë tifozësh të zhgënjyer.