Mexhiti mirëpriti delegacionet e Folk Fest në Komunën e Çairit

Në prag të natës finale të edicionit të 8-të të Folk Fest, Kryetari i Komunës së Çairit, Izet Mexhiti, mirëpriti sot organizatorët dhe përfaqësuesit e ansambleve pjesëmarrëse nga Meksika, Paraguai, Porto Riko, Gjeorgjia, Lituania, Bullgaria, Turqia, Rumania, Polonia, Estonia, Maqedonia, Kosova dhe Bosnja e Hercegovina.

Gjatë takimit, delegacionet prezantuan traditat dhe kulturat e vendeve që përfaqësojnë, ndërsa u diskutua për rëndësinë e festivaleve ndërkombëtare në afrimin e kulturave, promovimin e folklorit dhe krijimin e miqësive mes popujve.

“Çairi dhe Shkupi kanë qenë gjithmonë vende ku takohen kultura dhe tradita të ndryshme. Ju falënderoj që përmes artit, muzikës dhe folklorit tuaj pasuroni jetën kulturore të qytetit tonë dhe ndërtoni ura miqësie mes njerëzve nga vende të ndryshme të botës,” deklaroi Mexhiti.

Mexhiti u uroi mirëseardhje të gjithë pjesëmarrësve dhe suksese në natën finale të edicionit të 8-të të Folk Fest.