Nga 1 tetori fund drejtorëve të përkohshëm „të përjetshëm“: Mandati maksimumi gjashtë muaj

Drejtorët në detyrë do të mund të qëndrojnë në këtë funksion më së shumti gjashtë muaj, pas së cilës do të jetë e detyrueshme shpallja e një konkursi publik për zgjedhjen e drejtuesit të institucionit.

Kjo është një nga ndryshimet kryesore të Ligjit për Shërbimin e Lartë Drejtues, zbatimi i të cilit fillon më 1 tetor.

Ligji parashikon gjithashtu kritere më të rrepta për përzgjedhjen e personave drejtues në institucione. Ndërkohë, bordet drejtuese do të zvogëlohen dhe do të mund të kenë më së shumti tre anëtarë.

Ministri i Administratës Publike, Goran Minçev, deklaroi se Qeveria është e gatshme të fillojë menjëherë me zbatimin e rregullave të reja.

Nga rreth 100 pozita drejtuese që përfshihen nga ky ligj, për rreth njëzet prej tyre do të shpallen menjëherë konkurse publike.

Sipas planit, procedurat për përzgjedhjen e drejtuesve të rinj pritet të përfundojnë deri në fund të këtij viti.