Ermiona Lekbello reagon për videot intime: “Mos e fajësoni gruan për zgjedhjet e saj private”

Këngëtarja dhe modelja Ermiona Lekbello ka reaguar publikisht pas qarkullimit të disa videove intime në rrjetet sociale, duke dhënë qëndrimin e saj mbi mënyrën se si po trajtohen gratë e përfshira në këto materiale.

Përmes një videoje të publikuar në rrjetet sociale, Lekbello theksoi se jeta private dhe zgjedhjet personale të grave nuk duhet të kthehen në objekt gjykimi publik.

“Për qejfin e vet kanë shkuar, i donte qejfi. Është me dëshirë kjo gjë”, u shpreh ajo, duke iu referuar marrëdhënieve private të personave të përfshirë.

Më tej, Lekbello kritikoi atë që ajo e konsideron si standard të dyfishtë në shoqëri kur bëhet fjalë për burrat dhe gratë.

“Apo është në rregull që burrat të mbajnë nga 56 dashnore? Është në rregull? Po çfarë bëni? Mos i vini faj femrës, asnjëherë, në asnjë drejtim”, deklaroi ajo.

Sipas Lekbellos, gratë nuk duhet të mbajnë peshën e vetme të gjykimit për zgjedhje që i përkasin jetës së tyre personale, ndërsa theksoi se përgjegjësia dhe standardet duhet të jenë të njëjta për të gjithë.

Në vijim të reagimit, këngëtarja foli edhe për pozitën e grave shqiptare në shoqëri, duke vënë theksin te mungesa e mbështetjes dhe presioni i vazhdueshëm social.

“Femra shqiptare është e vuajtur. Femra shqiptare nuk ka përkrahje. Femra shqiptare është e vuajtur dhe është një viktimë e shoqërisë”, u shpreh Lekbello.

Me reagimin e saj, Ermiona Lekbello u pozicionua kundër gjykimit publik të grave për jetën e tyre private, duke bërë thirrje për më pak paragjykim dhe më shumë respekt ndaj zgjedhjeve personale.