MINISTRJA SANJA BOZHINOVSKA ZHVILLOI TAKIM PUNE ME KRYETARIN E ODËS EKONOMIKE, BRANKO AZESKIN, PËR PRIORITETET STRATEGJIKE NË ENERGJETIKË DHE MINIERA

Ministrja e energjisë, minierave dhe burimeve minerale, Sanja Bozhinovska, zhvilloi një takim pune me kryetarin e Odës Ekonomike të Maqedonisë së Veriut, Branko Azeski, ku u diskutua për zbatimin e Strategjisë së Minierave, përgatitjen e Strategjisë së re të Energjisë dhe përmirësimin e legjislacionit në fushat që janë në kompetencë të Ministrisë.
Në fokus të bisedimeve ishte Strategjia e Minierave dhe zbatimi i saj. Kryetari Azeski konfirmoi mbështetjen e Odës Ekonomike dhe komunitetit të biznesit për strategjinë. U theksua rëndësia e bashkëpunimit ndërmjet institucioneve dhe sektorit të biznesit për realizimin e përcaktimeve strategjike dhe krijimin e kushteve për zhvillimin e qëndrueshëm të sektorit minerar.
Vëmendje e veçantë iu kushtua edhe përgatitjes së Strategjisë së re të Energjisë në nivel shtetëror. Oda Ekonomike shprehu gatishmërinë për të marrë pjesë në këtë proces, së bashku me organizatat partnere ndërkombëtare. U theksua nevoja që drejtimet strategjike në sektorin e energjisë t’u përgjigjen trendeve të reja, ndryshimeve teknologjike dhe nevojave aktuale të sektorit të biznesit, me qëllim krijimin e një sistemi funksional që do të mbështesë rritjen ekonomike dhe zhvillimin e vendit.
Në takim u diskutua edhe për mundësitë e zhvillimit të industrisë automobilistike, me theks të veçantë në uljen e emetimeve të gazrave të dëmshëm dhe përmirësimin e cilësisë së ajrit. Ministrja Bozhinovska theksoi se mosha mesatare e automjeteve në vend është rreth 20 vjet, ndërsa numri i automjeteve elektrike dhe infrastruktura mbështetëse për to janë të kufizuara. U diskutua gjithashtu për nevojën e harmonizimit gradual me standardet bashkëkohore evropiane të emetimeve dhe krijimin e kushteve për zhvillimin e mobilitetit elektrik.
Bashkëbiseduesit konfirmuan gatishmërinë për thellimin e bashkëpunimit edhe në përmirësimin e legjislacionit për partneritetet publiko-private dhe koncesionet, fusha në të cilat kontributi i komunitetit të biznesit është i rëndësishëm për hartimin e zgjidhjeve funksionale dhe të zbatueshme. Ministria e energjisë, minierave dhe burimeve minerale vazhdon të forcojë bashkëpunimin me Odën Ekonomike dhe sektorin e biznesit, me synim zbatimin e qëndrueshëm të dokumenteve strategjike, përmirësimin e kornizës ligjore dhe krijimin e kushteve për zhvillim të qëndrueshëm ekonomik.