Mourinho thumbon Man Cityn: Ndoshta do të jem 80 vjeç kur të vijë dënimi

Jose Mourinho ka reaguar me ironi ndaj situatës së Manchester Cityt dhe procesit të gjatë për shkeljet e pretenduara të rregullave financiare të Premierligës.

Trajneri portugez, i cili në sezonin 2017/18 drejtonte Manchester Unitedin që përfundoi pas Cityt në tabelë, u pyet për vendimin lidhur me çështjen gjatë një interviste për “Corriere dello Sport”.

Mourinho tha se preferon të qeshë me situatën, duke theksuar se procesi mund të zgjasë edhe për shkak të ankesave të mundshme.

“Unë preferoj të qesh pak me këtë. Mendoj se do të ketë një përfundim, por ne të dyve në të 60-at do të na duhet fat që të jemi ende këtu kur të dalë vendimi përfundimtar. Është vendimi, pastaj do të ketë ankesa dhe ankesa”, deklaroi Mourinho.

“The Special One” vazhdoi me humor, duke thënë se mund të jetë 80 vjeç kur të merret vendimi përfundimtar ndaj Cityt, ndërsa shtoi se shpreson të jetë ende në futboll në atë moshë, nëse shëndeti do t’ia lejojë.

Çështja lidhet me hetimin e Premier League ndaj Manchester Cityt për shkelje të rregullave financiare në periudhën nga sezoni 2009/10 deri në 2017/18. Mourinho kishte arsye të veçantë për ta ndjekur këtë rast, pasi Manchester Unitedi i tij e mbylli sezonin 2017/18 në vendin e dytë, pas Cityt.