SMOGU MBULON AZINË/ Zjarret në Indonezi përkeqësojnë ndotjen, mbyllen shkollat

Publikuar 23:01 9 Tetor, 2026

Smogu toksik i shkaktuar nga zjarret në Indonezi ka mbuluar një pjesë të Azisë Juglindore. Ndotja e ajrit ka arritur nivele rekord në Singapor, ndërsa disa shtete në Malajzi kanë mbyllur shkollat për shkak të rrezikut shëndetësor. Autoritetet fajësojnë kryesisht zjarret e shkaktuara nga praktikat e paligjshme të djegies së pyjeve.

Zjarret në Indonezi po shkaktojnë një krizë të rëndë të ndotjes së ajrit në Azinë Juglindore. Tymi i dendur është përhapur përtej kufijve, duke mbuluar pjesë të Indonezisë, Malajzisë, Singaporit dhe deri në Filipine.

Në Singapor, smogu ka shkaktuar nivele rekord të ndotjes së ajrit, ndërsa qyteti pret zhvillimin e garës së Çmimit të Madh të Formula 1. Monumentet e njohura të qytetit janë mbuluar nga mjegulla e dendur, ndërsa dukshmëria është ulur ndjeshëm.

Edhe në kryeqytetin e Malajzisë, Kuala Lumpur, situata është e rënduar. Kullat Binjake Petronas dhe kulla Menara Kuala Lumpur mezi dallohen për shkak të shtresës së trashë të smogut.

Përballë rrezikut për shëndetin publik, autoritetet në disa shtete të Malajzisë kanë urdhëruar mbylljen e shkollave. Fëmijët dhe personat me probleme të frymëmarrjes konsiderohen ndër grupet më të rrezikuara nga ekspozimi ndaj ajrit të ndotur.

Problemi nis në Indonezi, ku zjarret kanë vazhduar prej javësh. Sipas autoriteteve, një pjesë e madhe e tyre lidhet me praktikat e paligjshme të prerjes dhe djegies së pyjeve, të përdorura për pastrimin e tokës nga fermerë dhe kompani.

Pasojat shëndetësore janë tashmë të dukshme. Vetëm nga korriku deri në shtator, autoritetet indoneziane regjistruan rreth 175 mijë raste të infeksioneve të frymëmarrjes të lidhura me zjarret.

Ekspertët thonë se kushtet janë përkeqësuar edhe nga fenomeni El Nino, i cili ka sjellë thatësirë më të madhe dhe ka favorizuar përhapjen e zjarreve.

Ndërsa flakët vazhdojnë në Indonezi, tymi po kalon kufijtë dhe po kthehet në një problem rajonal, duke ndikuar drejtpërdrejt në shëndetin, arsimin dhe jetën e përditshme të miliona njerëzve.