Tensione në televizionin pro-Vuçiq në Serbi, dhjetëra qytetarë hyjnë në ambientet e „Informer“-it

Disa dhjetëra qytetarë kanë hyrë sonte në ambientet e televizionit serb „Informer“ dhe kanë nisur një debat të ashpër me kryeredaktorin Dragan J. Vuçiqeviq, raportoi e përjavshmja „Vreme“. Ngjarja është transmetuar drejtpërdrejt, ndërsa Vuçiqeviq pretendonte se televizioni po përballej me një situatë pengmarrjeje.

Sipas raportimit, transmetimi i tensionuar ka nisur rreth orës 18:00. Vuçiqeviq, nga studioja, është përpjekur të kontaktojë policinë, por nga ana tjetër e linjës telefonike është dëgjuar përgjigjja se të gjithë zyrtarët policorë ishin të zënë në atë moment.

Gjatë transmetimit janë dëgjuar edhe goditje, origjina e të cilave nuk është përcaktuar. Në të njëjtën kohë, Vuçiqeviq ka deklaruar se pamjet e njerëzve para ndërtesës, të shfaqura gjatë programit, ishin të vjetra dhe nuk pasqyronin situatën aktuale.

Më pas, kryeredaktori ka kërkuar ndihmë nga Ilija Srdanoviq, bartësi i Listës Studentore në Serbi, me të cilin ka biseduar përmes telefonit në orën 18:28.

„Më lejoni ta verifikoj këtë informacion“, i është përgjigjur Srdanoviq. Ai ka shtuar se Vuçiqeviq kishte përhapur më herët shumë të pavërteta për të dhe se, për këtë arsye, duhej të sigurohej për vërtetësinë e pretendimeve.

Disa minuta më vonë, sipas „Vreme“, gjatë transmetimit është shfaqur një mur xhami në studio që dridhej nga goditjet, por nga ana tjetër nuk dëgjoheshin zëra.

„I bëj thirrje shtetit të na mbrojë“, ka deklaruar Vuçiqeviq.

Gjatë transmetimit është raportuar edhe një informacion i pakonfirmuar se një person brenda ndërtesës kishte pësuar krizë epileptike. Një gazetare ka telefonuar Shërbimin e Urgjencës drejtpërdrejt në emision, ku i është thënë se do të dërgohej ekipi i parë i lirë.

Rreth orës 18:40, siç raporton „Vreme“, disa dhjetëra qytetarë kanë hyrë në ambientet e televizionit dhe kanë nisur një debat me Vuçiqeviqin.