Malcom zbulon se çka i tha Messi para se të largohej më 2019

Lionel Messi kishte tentuar personalisht ta bindte Malcomin që të qëndronte te Barcelona, para se anësori brazilian të transferohej te Zenit St. Petersburg në gusht të vitit 2019.

Këtë e ka zbuluar vetë ish-futbollisti i Barcelonës, i cili ka treguar se kapiteni argjentinas besonte se ai kishte një të ardhme të ndritur në klub, pavarësisht vështirësive për të siguruar një vend në formacionin e trajnerit Ernesto Valverde.

Në vitin 2019, Barcelona pranoi ofertën e Zenitit për brazilianin, por Messi shihte te ai cilësi që mund ta bënin një pjesë të rëndësishme të skuadrës në të ardhmen.

Malcom, i cili iu bashkua Barcelonës nga Bordeaux në vitin 2018, ka folur me shumë vlerësim për sezonin e vetëm që kaloi përkrah Messit dhe mbështetjen që mori nga fituesi i tetë Topave të Artë.

“Gjithmonë u them miqve të mi se kam luajtur për një vit të tërë përkrah Messit. Ishte një përvojë e jashtëzakonshme. Ai gjithmonë më trajtonte në mënyrë të mrekullueshme”, ka treguar braziliani.

Biseda më e rëndësishme mes tyre ndodhi kur Malcom po përgatitej të largohej drejt Rusisë.

“Kur isha gati të largohesha për në Rusi, Messi erdhi të fliste me mua dhe më tha: ‘Ti je një lojtar me një të ardhme të shkëlqyer përpara dhe do të bëhesh një futbollist i madh’”, zbuloi ish-anësori i Barcelonës.

Më pas, argjentinasi ia bëri të qartë dëshirën e tij.

“Ai më kërkoi të qëndroja. Më tha: ‘Qëndro këtu, ti je njëri prej lojtarëve të Barcelonës për të ardhmen’”, shtoi braziliani.

Megjithatë, pavarësisht këmbënguljes së Messit, Malcom mendonte se qëndrimi te Barcelona do t’ia kufizonte mundësitë për t’u zhvilluar.

Konkurrenca për vendet në repartin ofensiv ishte shumë e madhe dhe për të ishte bërë prioritet aktivizimi i rregullt.

“Isha i ri dhe dëshiroja të luaja ndeshje, të fitoja përvojë dhe ta tregoja potencialin tim. Doja të dëshmoja në fushë se për çfarë isha i aftë”, shpjegoi ai.

Megjithatë, me kalimin e kohës, braziliani ka vënë në pikëpyetje nëse largimi ishte vendimi i duhur.

“Ndoshta nuk mora vendimin e duhur, por kërkoja të luaja rregullisht dhe për këtë arsye vendosa të shkoja në Rusi”, pranoi Malcom.

Barcelona e konfirmoi zyrtarisht transferimin e tij te Zenit në gusht të vitit 2019, për 40 milionë euro, plus pesë milionë euro të tjera në formë bonusesh.

Braziliani u largua nga Camp Nou pasi kishte regjistruar 24 paraqitje dhe katër gola gjatë sezonit 2018/19.

Kujtimet e Malcomit për Messin nuk kufizohen vetëm te biseda rreth së ardhmes së tij.

Ai ka kujtuar edhe mënyrën se si argjentinasi e kishte inkurajuar para gjysmëfinales së Kupës së Mbretit kundër Real Madridit në vitin 2019, ku braziliani shënoi golin e barazimit për Barcelonën në ndeshjen e parë.

“Më kujtohet se para El Clasicos kundër Real Madridit më tha: ‘Ne llogarisim në ty. Përgatitu, sepse do të luash’.

“Ai ishte gjithmonë aty për të më inkurajuar, motivuar dhe për të më dhënë besim, edhe kur isha i lodhur apo kur duhej të konkurroja me lojtarët e tjerë për një vend në skuadër”, shtoi ai.

Në fund, Malcom pranoi ndikimin e madh që Messi pati në zhvillimin e tij si futbollist.

“Mësova shumë nga Messi. Ai gjithmonë fliste me mua, më inkurajonte dhe më ndihmonte. Ishte një sezon i jashtëzakonshëm që nuk do ta harroj kurrë”, përfundoi braziliani.