Platforma X pezullon llogarinë e fushatës së kandidatit palestinezo-amerikan për Senat, Ahmed Moor
Platforma e rrjeteve sociale X ka pezulluar llogarinë e fushatës së shkrimtarit palestinezo-amerikan Ahmed Moor, disa ditë pasi ai njoftoi kandidimin në zgjedhjet paraprake të Partisë Demokratike kundër senatorit amerikan John Fetterman, në zgjedhjet e vitit 2028 në Pensilvani, transmeton Anadolu.
MARKETING
Moor njoftoi për pezullimin të mërkurën përmes llogarisë së tij personale në X, duke publikuar një pamje të njoftimit të shfaqur në llogarinë e fushatës së tij, @moorforpa.
“Miq! Tashmë është zyrtare! Ne përbëjmë kërcënim! Ata e kanë pezulluar llogarinë e fushatës. Na ndihmoni të ruajmë vrullin duke shpërndarë postimin dhe ju lutemi, merrni në konsideratë të kontribuoni financiarisht”, shkroi ai.
Në njoftimin për pezullimin thuhej se X “pezullon llogaritë që shkelin rregullat e saj”, por nuk specifikohej se cili rregull dyshohej se ishte shkelur dhe as nuk jepej ndonjë shpjegim për vendimin.
Sipas njoftimit të mediave, llogaria e fushatës kishte grumbulluar më shumë se 33 mijë ndjekës brenda rreth tri ditësh nga hapja e saj.
Fushata e Moorit reagoi për pezullimin përmes një postimi në platformën Bluesky, ku thuhej: “Epo, tashmë është zyrtare, Elon Musk nuk është mbështetës i fushatës sonë! Llogaria jonë e fushatës është pezulluar”.
Moor njoftoi kandidimin për Senat të hënën, duke u pozicionuar si sfidues i Fettermanit, një demokrat që është përballur me kritika nga qarqet progresiste për mbështetjen e tij të fuqishme ndaj Izraelit.
“Po kandidoj për t’i dhënë fund luftës në Iran dhe për të promovuar agjendën e dinjitetit: kujdes shëndetësor falas, kujdes falas për fëmijët dhe banesa të përballueshme”, tha Moor në njoftimin e kandidimit.
“Bëj thirrje për përgjegjësi për gjenocidin, për ICE-n dhe korrupsionin. Dhe, së fundi, për mbrojtjen e lirive tona civile në Amerikë”, tha ai.
Moor, i cili ka lindur në Gaza dhe jeton në Filadelfia, ka kritikuar mbështetjen e SHBA-së për Izraelin dhe ka bërë thirrje që shpenzimet publike t’u japin përparësi nevojave të brendshme të vendit.
